Бүгүн, кулун тутар 14 күнүгэр Сунтаар улууһун Хадан нэһилиэгэр үөрүүлээх түгэн тосхойдо. Ол курдук, нэһилиэк 8 ыала саҥа дьиэ күлүүһүн туттулар. Бу аҕыйах кэм иһинэн Хадаҥҥа икки 4-түү кыбартыыралаах дьиэни «Главстройкомплекс» тутуу тэрилтэтэ тутан үлэҕэ киллэрдэ.
Тутуу дойду бэрэсэдиэнэ Владимир Путин көҕүлүүр «Олорор дьиэ уонна куорат эйгэтэ» национальнай бырайыак «Хаарбах дьиэттэн дьону көһөрүү» федеральнай бырагыраама чэрчитинэн тутулунна.
Бу үөрүүлээх түгэҥҥэ улуус баһылыга Анатолий Григорьев, Ил Түмэн дьокутааттара ¬– хонтуруоллуур кэмитиэт бэрэссэдээтэлэ Андрей Николаев уонна «Барҕарыы» национальнай фонда салайааччыта Афанасий Постников, «Главстройкомплекс» тэрилтэ бэрэстэбиитэлэ, тутааччы Анатолий Файрушин, Хадан нэһилиэгин баһылыга Андрей Оконешников уонна нэһилиэк олохтоохторо кытыннылар. Саҥа дьиэҕэ киирээччилэргэ истиҥ эҕэрдэлэрин тириэртилэр, тутааччыларга махталларын эттилэр.
Манна даҕатан эттэххэ, былырыын сыл бүтүүтэ «Доруобуйа харыстабыла» национальнай бырайыак чэрчитинэн саҥа ФАП үлэҕэ киирбитэ. Аны спорткомплекс тутуллара былааҥҥа турар. Онон Хадан нэһилиэгэ үүнэр-сайдар.
Дмитрий ЫМЫЧАНОВ