Бу күннэргэ Сунтар нэһилиэгэр хаары тиэйии, таһыы үлэтэ күргүөмнээхтик бара турар. Нэһилиэк иһинээҕи уулуссалартан хаары тиэйиини МАУ «Сунтар» тэрилтэ ыытар. Бүгүҥҥү күн туругунан суолтан 330 куб хаар анал сиргэ тахсан турар. Быйыл хаар элбэх. Онон уулуссалартан хаар тиэйиитин үлэтэ күннэтэ ыытыллар. Хаары нэһилиэк тас өттүгэр анал сиргэ таһааран сүөккүүллэр. Быйыл Чохулаах кэннигэр баар карьеры анаатылар.
Хаары анал ыйыллыбыт сиргэ тиэйии чааһынай дьоҥҥо эмиэ сыһыаннаах. Билигин үгүс дьон хаардарын суол кытыытыгар ханаабаҕа таһааран куталлар. Оччотугар күүстээх ириэрии кэмигэр хаар ситэ ууллубакка хоруунан уу барарыгар харгыстары үөскэтэр. Хаар таһар өҥөнү оҥорор дьонтон туоһуласпыппытынан Чохулаахха тиэйэр массыына өҥөтүн уонна тыраахтыр үлэтин киллэрэн 3000 солк. диэтилэр.
Эрдэ эппиппитин курдук, быйыл сөҥүү элбэх, онон сааскы хаар уута элбиир чинчилээх. Онон Сунтаар нэһилиэгин дьаһалтата чааһынай дьонтон уу барар хоруулары бөҕүнэн-саҕынан, хаарынан бүөлээбэккитигэр ыҥырар уонна тэлгэһэҕит хаарын анал ыйыллыбыт эрэ сиргэ таһаараргытын санатар.
Мира АФАНАСЬЕВА