Алтынньы 15 күнүттэн сэтинньи 15 диэри фоновай хаамыыга Арассыыйа чөмпүйэнээтэ буолан ааста. Алта бөлөҕүнэн үс тыһыынчаттан тахса хамаанда кыттыыны ылла.
Бу «Человек идущий» бырайыак Арассыыйа таһымыгар ыытыллар тэрээһин буолар. «Лига здоровья нации» благотворительнай пуонда көҕүлээһининэн, Арассыыйа успуордун министиэристибэтин өйөөһүнүнэн «Спорт — норма жизни» федеральнай бырайыак чэрчитинэн 2019 сылтан ыытыллар тэрээһин сылын аайы балаһыанньата уларыйан иһэр. Быйыл маассабаһы көҕүлээннэр, элбэх киһини хабаары анал сыһыарыы оҥорбуттар.
Биһиги улууспутуттан «Хардыы» хамаанда туруоран хаамыыга кытынныбыт. Бу биир ый устата хамаанда уопсай хаамыытын ааҕыыга 532 муниципальнай хамаандаттан «Хардыы» 73 миэстэҕэ таҕыста. 45 кыттааччы (ол иһигэр аҕам саастаахтарбыт 38%), барыта 13043884 хардыыны оҥорбут.
Бастыҥнар ахсааннарыгар киирдилэр: Капитолина Ильина – 735 тыһ. хаамыы., Христина Ю – 721 тыһ., Арина Павлова – 708 тыһ., Валентина Иванова – 636 тыһ., Ирина Спирова – 365 тыһ., Светлана Ю – 363 тыһ., Сарыал Михайлов – 354 тыһ., Александр Романов – 351 тыһ., Агния Докторова – 330 тыһ., Антонина Гуринова – 314 тыһ.
Хаамыы — бастыҥ дьарык! Элбэхтик хаамыҥ, чэгиэн буолуҥ!
Мария ВАСИЛЬЕВА, маассабай успуорт инструктора