Маннык ааттаммыт тэрээһиннэри Аллыҥа нэһилиэгин “Үрүйэчээн” оҕо уһуйааныгар Арассыыйа, ДНР Дьоруойдара Дмитрий Егоров төрөөбүтэ 50 сылыгар ананан ыытылынна. Уһуйаан оҕолоругар «дьоруойдуу быһыы», «хорсун санааланыы» диэн өйдөбүллэри быһааран кэпсиир төһө да уустуктардааҕын иһин, бастаан остуоруйалартан, олоҥхо дьоруойдарыттан кэпсээн саҕалаан, үтүө-мөкү быһыылары хартыынанан сирдэтэн көрдөрөн билиһиннэрэр тоҕоостоох. Ол курдук, аан бастаан Дмитрий Николаевич төрөөбүт күнүгэр улахан бөлөх оҕолоро «Мин кыракый дьоруойбун» диэн спортивнай күрэхтэһиигэ күөн көрүстүлэр.
Икки нэдиэлэ устата улахан бөлөх оҕолоро дьоруой диэн тыл суолтатын быһаарыытын, «Герой России» мэтээли уруһуйдааннар, Георгиевскай лиэнтэ тоҕо икки өҥнөммүтүн дьарыктаныыларга биллилэр-көрдүлэр.
Маны тэҥэ төрөппүттэргэ, оҕолорго, үлэһиттэргэ Дмитрий Егоров хорсун быһыытын, бойобуой олоҕун көрдөрөр истиэндэ бэлэмнээн көрдөрүлүннэ, ону сэргэ Саха сирин дьоруойдарыгар анаммыт патриотическай муннук оҥоһулунна.
Дэкээдэ түмүктэниитэ «Кини кимий?» диэн Саха сириттэн Сэбиэскэй сойуус, Арассыыйа дьоруойдарыгар анаммыт биктэриинэ үлэһиттэр, төрөппүттэр икки ардыларыгар ыытыллан, төрөппүттэр кыайыыны ылары ситистилэр. Маны таһынан төрөппүттэргэ «Дьоруой – кини кимий?» диэн кылгас ыйытык ыытылынна. Уһуйаан уран тарбахтаах үлэһитэ Аркадий Пахомов Дьоруой Дмитрий Егоров мөссүөнүн маска кыһан үүт-үкчү оҥорон таһаарбыта дьону сөхтөрдө.
Дьоруой аатын үйэтитии – кэнэҕэс ыччаттарга үтүө холобур буолар, быйыл үүммүт сылбыт Аҕа дойдуну көмүскээччи сылынан биллэриллибитэ ону туоһулуур.
Лилия СЕРГЕЕВА