Фашизмы утары өрөспүүбүлүкэтээҕи форум быйыл иккис төгүлүн киэҥ далааһыннаахтык ыытылынна. Форум иитинэн нэдиэлэ устата элбэх тэрээһин буолла.
Манна Илиҥҥи байыаннай уокурук салалтата, Россия экспердэрэ, СӨ судаарыстыбаннай уонна муниципальнай былааһын уорганнарын бэрэстэбиитэллэрэ, бэлитиическэй баартыйа чилиэттэрэ, байыаннай дьайыы бэтэрээннэрэ, куораттааҕы уокуруктар уонна улуустар дэлэгээссийэлэрэ, судаарыстыбаннай тэрилтэлэр бэрэстэбиитэллэрэ уонна өрөспүүбүлүкэ уопсастыбаннаһа кыттыыны ыллылар.
Форум пленарнай чааһын С.А. Зверев-Кыыл Уолун аатынан норуот айымньытын киинигэр Сунтаар олохтоохторо быһа сибээскэ холбоммутун көрдүлэр. Кэлбит дьон тэрээһин суолтата улаханын бэлиэтээтилэр, итиэннэ бэйэлэрин санааларын-оноолорун, көрүүлэрин эттилэр.
Борис Васильев, Сунтаардааҕы үөрэҕирии салалтатын салайааччыта: «Фашизм сүтэрин туһугар маннык форум ыытыллара хас биирдиибитигэр олус туһалаах. Манна оскуола үөрэнээччилэригэр тиийэ сэҥээрэн иһиттилэр. Форум үлэтин түмүгүнэн резолюция ылыналлара наадалаах. Арассыыйаҕа сөп сокуоннар ылыллыбыттар дии саныыбын. Нацизм утары 10-11 кыл. история кинигэтэ былырыын уларыйбыта. Ааптардар дьиҥнээҕи көрөн, саамай сөпкө оҥорбуттар. Урукку кинигэҕэ киһи сөпсөспөтө элбэх этэ. ОБЗР (Основы безопасности и защита Родины) диэн саҥа биридимиэт киирдэ. Урукку НВП курдук. Бу кинигэҕэ аҥаардас сэриигэ эрэ бэлэмниир туһунан буолбакка, патриотическай өттө элбэх. Сыл аайы улууспутугар Устье оскуолатын базатыгар 5 хонуктаах байыаннай хомуур тэриллэр. Манна 10-с кылаас уолаттара бары сылдьаллар. Күнүн өссө уһатан биэрэр киһи, ордук билии ылыа эбиттэр».
Саргылана Омукова, Сунтаар улууһун култууратын уонна айылгытын салалтатын салайааччыта: «Биһиги бу форуму куйаар ситиминэн быһа сибээскэ холбонон көрдүбүт-иһиттибит. Хомойуох иһин, сибээс мөлтөх буолан, сорох чааһын үчүгэйдик көрбөтүбүт. Маныаха биһиги култуура салайааччылара, тустаах дьоҥҥо санаабытын эттибит. Инники өттүгэр итинник быһа холбонуу тэрээһинин үчүгэйдик сибээһи олохтоон, бэлэмнээн баран ыытыахха наадатын. Билиҥҥи көлүөнэҕэ фашизмы утары диэн патриотическай өй-санаа, киһи сиэрэ-майгыта биһиги иннинээҕи көлүөнэ, Аҕа дойду сэриитин кыттыылаахтара уонна билигин анал байыаннай дьайыыга сылдьар уолаттарбыт холобур буолаллар. Бу тэрээһиҥҥэ Донецкай уобаластан кыттыбыт киһини сэҥээрэ иһиттим, сүрдээх киһини уйадытар этиилэри эппитэ. Ол курдук, Саха сириттэн сылдьар байыастар хорсуннарын сөҕөрүн билиммитэ. Арассыыйа уонна Саха сирэ кинилэргэ көмө буолалларыгар махтанар».
Трофим Иванов, Сунтаар улууһун ыччат политикатын отделын салайааччыта: «Дойдуга буола турар билиҥҥи балаһыанньа араас өрүттээх, тургутуулаах кэмигэр, маннык суолталаах форум тэриллэрэ олус наада. Историяны билэрбит туһугар, маннык үлэ ыытыллара суолталааҕынан ааҕабын».
Илона Бурцева, Сунтаардааҕы 1-кы нүөмэрдээх оскуола педагог организатора: «Үчүгэй тэрээһин буолла. Бу курдук хабааннаах патриотическай тэрээһиннэр билиҥҥи кэмҥэ олус наадалаахтар дии саныыбын. Сүрүннээн оҕолорго, эдэр ыччакка олус туһалаах».
Александра Ефимова, «Түмэн» эдэр ыччат түмсүүтүн салайааччытын солбуйаччы: «Фашизм – бу бэйэтин омугун утарыта туруоруу уонна ону бигэргэтии атын омуктартан үрдүктүк сыаналааһын диэн өйдүүбүн».
Ил Дархан Айсен Николаев тэрээһин түмүктүүр мунньаҕар, «фашизмы утарар өрөспүүбүлүкэтээҕи форум үгэскэ кубулуйан ыытыллыа», — диэн эттэ.
Елизавета ТИТОВА