Бүгүн, сэтинньи 6 күнүгэр, С.А. Зверев-Кыыл Уолун аатынан норуот айымньытын киинигэр, Сунтаар нэһилиэгин олохтоохторо иккис өрөспүүбүлүкэтээҕи фашизмы утары форумҥа быһа сибээскэ кыттыстылар. Форум сүрүн сыала – фашизм суоһуурун туһунан сэрэтии, XXI үйэҕэ неофашизм чөлүгэр түһүүтүн утары күүстээх миэрэлэри ылыныы буолар.
Улууспут баһылыга Анатолий Григорьев: «Урут этэр этибит, тоҕо биһиги Арассыыйа курдук баай дойдуга олороммут, арҕаа дойдулартан олохпут таһыма намыһаҕый? — диэн. Аҕыйах тылынан быһааран этэр буоллахха, 90-с сылларга ыһыллыы-тоҕуллуу кэмигэр арҕааҥы дойдулар биһиги баайбытын үллэстээрилэр, бүтүн Сэбиэскэй Сойуу ыспыттара уонна бэйэлэрин санааларынан оҥорбут Арассыыйа Конституциятыгар аҕыйах хонуктааҕыга диэри үлэлээн кэллилэр. Бу Конституцияҕа олоҕуран, биһиги дойдубутугар хостонор сирбит баайын, собуоттары баһылаан-көһүлээн олордулар. Онуоха, Дойдубут бэрэсидьиэнэ Владимир Путин тута тосту уларыппакка, кыра-кыралаан, кэрчик-кэрчигинэн сааһылаан, дойдубут Конституциятыгар уларытыы киллэрэн, онно олоҕуран тас дойдуттан биһиги баайбытын билэр дьоннору туоратааһын буолла. Ити дьоннор баайы куоттарбат сыалтан Украина нөҥүө, биһиэхэ улахан алдьархайы киллэрдилэр. Владимир Путин ону сөпкө өйдөөн, ырааҕы ыраҥалаан маннык анал байыаннай дьайыы оҥоһуллубута. Анал байыаннай дьайыы этэҥҥэ түмүктэнэн, бэйэбит баайбытын бас билэр кыахтаннахпытына сайдыы суолугар бигэтик киириэхпит. Онон, улууһум дьоно ону сөпкө өйдүөх тустааххыт. Кэскиллэрбит инникитин санаан туран туруулаһан үлэлиэхтээхпит, санаабыт бөҕө буолуохтаах. Кыайыы кэлэрэ кыра хаалла, байыастарбытын төһө кыалларынан өйүөххэ, күүс-көмө буолуохха. Этэҥҥэ, түргэнник, доруобай эргиллэн кэлэллэригэр Үөһэ Айыылартан көрдөһүөххэйиҥ», – диэн эттэ.
Бүгүҥҥү форуму улуус тэрилтэлэрин салайааччыларыттан саҕалаан оскуола үөрэнээччилэригэр тиийэ кэлэн иһиттилэр. Форум үлэтин түмүгүнэн резолюция ылыныллыаҕа.
Түмүккэ, соторутааҕыта күөх экраҥҥа тахсыбыт, Саха сирин успуордун уонна чулуу бөҕөстөрүн ааттатар, үйэтитэр М. Лукачевскай «Триумф» киинэтин көрдөрдүлэр.
Елизавета ТИТОВА