“Муус устар – 2025” бэстибээл иитинэн асчыттарга аналлаах Иннокентий Тарбахов аатынан “Асчыт кистэлэҥэ” күөн күрэскэ биһиги улууспутуттан Евгения Слюсарь ситиһиилээхтик кытта сылдьар. Бу күрэскэ өрөспүүбүлүкэ араас муннуктарыттан барыта 11 кыттааччы бэйэлэрин кыахтарын көрдөрөн холоннулар. Кинилэр “Тыгын Дархан” эрэстэрээн асчыттарын Николай Атласов уонна Константин Матаннанов маастар-кылаастарыгар сылдьан, төрүт аспыт уратытын, туох кистэлэҥнээҕин туһунан элбэҕи биллилэр-көрдүлэр. Ону тэҥэ күөрчэҕи, саламааты хайдах минньигэстик астыырга үөрэннилэр. Күрэс үөрүүлээх арыллыытыгар төрүт аһы тарҕатааччы, саха омуга киэн туттар киһитэ – Иннокентий Тарбахов төрөппүт кыыһа Агафья Харлампьева: “Саха култууратын, саха аһын үрдүк таһымҥа таһаараргытыгар”, – диэн аҕатын баҕа санаатын кыттааччыларга тириэртэ.
Биһиги Евгениябыт икки күннээх полуфиналга тыҥааһыннаах киирсиини ааһан, ас амтаннааҕын, минньигэһин астаан сарсыҥҥы финалга эрэллээхтик киирдэ. Түмүктүүр түһүмэххэ кыттааччылар туох, хайдах бүлүүдэни астыыллара «кистэлэҥ дьааһык» эрэ быһаарыа. Дьүүллүүр сүбэ ас амтанын эрэ буолбакка ураты көстүүтүн уонна төрүт үгэһи сыаналыа. Күрэх түмүгүнэн 3 кыайыылааҕы быһаарыахтара, сыаналаах бирииһинэн наҕараадалыахтара.
Елизавета ТИТОВА