С. А. Зверев-Кыыл Уолун аатынан норуот айымньытын киинигэр, саха норуотугар ураты суолталаах Өрөспүүбүлүкэбит күнүн көрсө бүгүн үөрүүлээх тэрээһин буолла. Сахалыы таҥныбыт дьон оһуокай тула түмүстэ.
Бу күҥҥэ аналлаах тэрээһин үөрүүлээх чааһа өрөгөй ырыатынан саҕаланна. Өрөспүүбүлүкэни туруулаһан төрүттэспит чулуу, киэн туттар дьоммутун ахтан-санаан ыллыбыт, кинилэр тустарынан хоһоон ааҕылынна, кылгас видеосюжет көһүннэ.
Бу бэлиэ күн улуус, өрөспүүбүлүкэ социальнай-экономическэй сайдыытыгар кылааттарын киллэрбит, билигин ситиһиилээхтик үлэлии сылдьар биир дойдулаахтарбытыгар улуус дьаһалтата, өрөспүүбүлүкэ таһымнаах наҕараадалар туттарылыннылар. Ол курдук, СӨ социальнай-экономическай сайдыытыгар кылаатын иһин, СӨ Бырабыыталыстыбатын Грамотатынан Борис Уларов наҕараадаланна. СӨ бэрэсидьиэнин Махтал суругун дьоруой Дмитрий Егоров аҕата Николай Егоров тутта. «Сунтаар сонуннара» улуус хаһыатыгар өр сылларга кылаабынай эрэдээктэринэн үлэлээбит, Борис Николаев, хаһыат билиҥҥи кылаабынай эрэдээктэрэ Юлия Алексеева «Сунтаар улууһун социальнай-экономическай сайдыытыгар кылаатын иһин» анал бэлиэнэн наҕараадаланнылар. Мантан да үгүс элбэх наҕараада өспүүбүлүкэбит сайдыытын туһугар килбиэннээхтик үлэлии сылдьар үгүс биир дойдулаахтарбытыгар туттарылыннылар.
Маны сэргэ, 14 саастарын туолбут оҕолорго бастакы пааспардарын үөрүүлээх быһыыга-майгыга туттарааһын буолла.
Алена ИВАНОВА
