Николай Тарскай кэриэһигэр көҥүл тустууга 68-с төгүлүн ыытыллар өрөспүүбүлүкэ чөмпүйэнээтэ бүгүн бастакы күнэ. Чөмпүйэнээт Арассыыйа уонна ДНР Дьоруойа Дмитрий Егоров төрөөбүтэ 50 сылыгар ананан ыытылла турар.
Тустууну көрө улууспут олохтоохторун сэргэ, ыаллыы сытар улуустартан эмиэ элбэх киһи кэлэн манежка тобус-толору киһи. Маны таһынан бочуоттаах ыалдьыттарынан 1976 с. Монреал куоракка буолбут Олимпийскай оонньуулар чөмпүйүөнэ Павел Пинигин, үрүҥ көмүс призера Александр Иванов кэргэнинээн Варвара Афанасьевналыын, СӨ успуордун миниистирин бастакы солбуйааччы Гаврил Мохначевскай, успуорт үтүөлээх маастара Василий Гоголев, Ньурба улууһун баһылыга Алексей Иннокентьев, Чурапчы улууһун баһылыга Степан Саргыдаев уо.д.а буолаллар.
Биирдиилээн уонна хамаанданан бастыыр иһин өрөспүүбүлүкэ улахан күрэхтэһиитигэр 18 хамаанда бары ох курдук оҥостон кэлбиттэрэ харахха быраҕыллар, спортсменнар туруммуттара өтө көстөр.
Чөмпүйэнээт үөрүүлээх аһыллыытын улуустааҕы култуура үлэһиттэрэ хаһан да буоларын курдук, сүрдээх үчүгэйдик толкуйдаан тэрийбиттэр диэн тустууну көрө кэлбит дьон бэлиэтиир. Улууспут баһылыга Анатолий Григорьев чөмпүйэнээт аһыллыбытынан эҕэрдэлээн туран, тустууктарга ситиһиини баҕарда. Спортивнай комментатор Көрдьүгэҥҥэ 70 уонна Дьоруойбут Дмитрий Николевич аҕатыгар Николай Егоровка 80 саастарынан улуус дьаһалтатын эҕэрдэ суругун сэргэ бэлэх туттартаарта. Оттон биһиги улууспутугар өрөспүүүбүлүкэбит успуордун министиэристибэтэ улууска тустуу көбүөрүн ыларга диэн сэртиикээт туттарда, ону сэргэ успуортка ситиһиилээх дьону наҕараадалары туттардылар.
Кыайыы Знамятын күөрэччи тутан манежка киириилэрин мустубут дьон сүһүөхтэригэр туран көрүстүлэр. Бочуоттаах ыалдьыттар, улуус, нэһилиэк салалталара үөрүүлээх чаас кэнниттэн Албан Аат болуоссатыгар тахсан Аҕа дойду улуу сэриитигэр сырдык тыыннара быстыбыт биир дойдулаахтарбытын чиэстээн сөҥүөрэн турдулар, умуллубат төлөҥҥө гирлянда уурдулар.
Яина ВЛАСЬЕВА