Уһун өрөбүллэр кэннэ, өйүүн үлэ бэрээдэгэр киирэр күммүт үүнэр. Бэҕэһээ эрэ бүтэһик үлэ күнүн түмүктээн дьиэбит диэки үөрэ-көтө хааман испиппит… Номнуо үлэбитигэр тахсар күммүт бу тирээн кэллэ… Сынньаныахтаахпыт оннугар эппит-сииммит мөлтөөбүт, күүспүт-уохпут өһүллүбүт, өйбүт-санаабыт бытаарбыт курдук буолбут. Биир тылынан эттэххэ налыйан, уоскуйан хаалбыппыт. Биллэн турар, киһиэхэ маннык турук эмиэ наада. Ол эрэн, үлэ эбээһинэһин умнуо суохтаахпыт. Үлэ кыраапыгар түргэнник киирэр туһунан куйаар ситимиттэн булбут тэттик сүбэлэрбитин таһаарабыт.
- Бырааһынньыктааҕы өрөбүллэргэ олус көхтөөхтүк сынньаммыт буоллаххытына, үлэҕэ тахсыаххыт икки күн иннинэ дьиэҕитигэр олорон сынньанын, ханна да барымаҥ-кэлимэҥ. Барыыга-кэлиигэ, айаҥҥа киһи элбэх энергиятын барыыр.
- Аһыыр аскытыгар эмиэ болҕомтото туһаайыҥ. Фрукта, оҕуруот аһын элбэхтэ сиэн дииллэр. Ол эрээри, сахаларга эт минэ туохтааҕар да күндү буолар. Ону тэҥэ, собо минэ эмиэ аскын хонтуруоллуургар олус туһалааҕа биллэр.
- Түүнү күнүс, күнүһү түүн оҥорбут дьон баар буоллаҕына, эрдэ сытан утуйарга сүбэлииллэр. Бастакы кэмнэргитигэр утуйар уугут кэлиэ суоҕа эрээри. Мэйиигит эрдэ утуйарга сааһыланыаҕа. Саамай сүрүнэ утуйуоххут иннинэ араас гаджеттары тутумаҥ, утуйан сынньанаргытыгар мэһэйдиэҕэ.
- Оҕо өрөбүл кэнниттэн оскуолаҕа барарыгар бэлэмнэнэрин курдук, эһиги эмиэ үлэҕитигэр кэтэр таҥаскытын-сапкытын сааһыланыҥ, суумкаҕыт иһин көрүнүҥ. Үлэ күнүгэр эмискэ утуйан турдугут да үлэҕит диэки ыстаммат курдук. Дьиэҕитигэр кыра хомунуута оҥоруҥ. Үлэ күнүгэр дьиэҕитигэр-уоккутугар чэпчэкитик сылдьыаххыт. Хомуллубут дьиэ эһиги ис туруккут сааһыламмытын көрдөрөр. Оччоҕо бэйэҕит да билбэккитинэн мэйиигит үлэ тэтимигэр киирэргэ бэлэм буолуоҕа.
Бу тэттик сүбэлэри тутустаххытына үлэ күнүн бэлэмнээх көрсүөххүт!
Мира АФАНАСЬЕВА