Дойдубут Бэрэсидьиэнэ Владимир Путин өйөбүлүнэн өрөспүүбүлүкэбитигэр тутуллуохттаах Өлүөнэ өрүһү туоруур муоста бастакы сыбаайата бүгүн түстэ. Бэлиэ түгэнинэн Ил Дархан Айсен Николаев эҕэрдэлээтэ уонна ураты тутуу 2028 с. диэри тутуллан олоххо киириэхтээҕин эттэ.
Сунтаар улууһун баһылыга Анатолий Григорьев тус санаатын маннык үллэстэр:
«Бүгүн биһиги Сахабыт сирин устуоруйатыгар киирэр улахан бэлиэ түгэн тосхойдо. Ол курдук, Саха сирин дьоно-сэргэтэ өр күүппүт Өлүөнэ өрүһү туоруур муостабыт тутуутун маҥнайгы сыбаайата түспүт үөрүүлээх күнэ. Өлүөнэ өрүс муостата аҥаардас илин эҥэр улуустарын эрэ өрөспүүбүлүкэ киинин кытары холбуур буолбакка, Сахабыт сирин сайдыытыгар сүдү суолталаах муоста буолар. Үөрүүлээх күнүнэн Сахабыт сирин кытта Сунтаарбыт улууһун дьоно-сэргэтэ бииргэ үөрэбит. Муоста тутуллуута өрөспүүбүлүкэбит социальнай-экэнэмиичэскэй сайдыытыгар улахан төһүү күүс буолуо диэн эрэнэбит«.
Алена ИВАНОВА