Тохсунньу 27 күнүгэр Элгээйи нэһилиэгэр үгэс буолбут сылын аайы ыытыллар Ленин уордьаннаах “Элгээйи”сопхуос бастакы дириэктэрэ Семен Максимович Журавлев кэриэһигэр дуобат күрэҕэ буолан ааста. Турниры Элгээйи нэһилиэгин олохтоох дьаһалтата, нэһилиэк успуорка түмэлэ тэрийэн ыыттылар. Ол курдук, турнир буолар күнүгэр нэһилиэк историятын сырдатар “Туойдаах Алаас” түмэлгэ дьон тоҕуоруһа муһунна. Дуобат күрэҕэ саастарынан көрөн хас да бөлөҕүнэн аарарыллан ыытылынна. Манна Элгээйи куустатын нэһилиэктэриттэн уопсайа 44 күрэхтэһээччи (32 улахан киһи, 12 оҕо) кытынна.
Уһун күн тыҥааһыннаах киирсии кэннэ эр дьонҥо 70-нарыгар диэри саастаахтарга Түбэй-Дьаархантан сылдьар Юрий Титов кыайыылаах таҕыста. II м. – Мухтар Макаров (Элгээйи), III м. – Семен Данилов (Түбэй-Дьаархан).
Эр дьоҥҥо 70-ннарыттан үөһээ саастаахтарга Элгээйи дуобатчыта Владимир Уаров кыайыы көтөллөннө. Кутанаттан сылдьар Федор Акимов II м. таҕыста. Түбэй-Дьаархан оонньооччута Фрументий Сафронов III м. ылары ситистэ.
Дьахталларга кимиэхэ да иннин биэрбэккэ, Элгээйи дуобатчыта Вера Семенова бастаата. Иккискэ Кэмпэндээйиттэн сылдьар Галина Гуринова таҕыста. Оттон үһүс бириистээх миэстэни Түбэй дуобатчыта Тамара Павлова ылла.
Куустатааҕы турнирга улахан дьону сэргэ оҕолор бэрт кимиилээхтик киирситилэр. Ол түмүгүнэн улахан оҕолорго: I м. – Вадим Иванов (Элгээйи), II м. –Сима Иванов (Элгээйи), III м. –Айсен Иванов (Элгээйи) буоллулар.
Кыра саастаах оҕолорго Хоро кэскиллээх дуобатчыта Дима Петров I мэстэни ылан үөрүү көтөллөннө, II миэстэҕэ Дуолан Михайлов (Элгээйи) таҕыста, III миэстэни, Эрсан Чярин (Элгээйи) ылла.
Бүтэһиккэ, үгэс быһыытынан, блиц-турнир ыытылынна. Манна чыпчылҕан түгэнэ кыайыыны Түбэй-Дьаархан дуобатчыта Иннокентий Прокопьев ситистэ. II миэстэҕэ Мухтар Макаров (Элгээйи) таҕыста, III м. Түбэй Дьаархантан сылдьар Иннокентий Титов буолла.
Кыайыылаахтар мэтээлинэн, грамотанан уонна өйдөбүнньүк бириистэринэн наҕараадаланнылар. Тэрээһини Кутана, Күүкэй, Күндэйэ, Кэмпэндээйи, Түбэй-Дьаархан, Түбэй уонна Элгээйи нэһилиэгин дьаһалталара спонсордаатылар.
Олохтоох дьаһалта аатыттан дуобат турнирын ыытарга күүс-көмө буолбут успуорт бэтэрээннэригэр Егоров Прокопий Митрофановичка, Семенов Николай Макаровичка, Николаев Юрий Ивановичка, Уаров Владимир Ивановичка уонна спонсардаабыт Элгээйи куустатын нэһилиэктэрин дьаһалталарыгар улахан махталбытын этэбит.
Мария ЯКОВЛЕВА.