Бүгүн Сунтаар улууһун Элгээйи нэһилиэгэр СӨ успуордун бочуоттаах маастара, Сунтаар улууһун, Арыылаах нэһилиэгин бочуоттаах олохтооҕо Виктор Николаев-Хотой Бииктэр бирииһигэр XXV төгүлүн ыытыллар өрөспүүбүлүкэтээҕи мас тардыһыы күрэҕэ үөрүүлээхтик аһылынна.
Санатар буоллахха, бу турнир икки сылга биирдэ ыытыллар тэрээһин.
Киэҥ далааһыннаах мадьынылар күөн күрэстэрэ бу күн Элгээйитээҕи успуорт саалатыгар Сахабыт сирин араас муннугуттан спортсменнары, успуорт маастардарын, успуорду сэҥээрээччилэри түмэ тарта. Манна өрөспүүбүлүкэ тоҕус улууһуттан уонна Дьокуускай куораттан уопсайа 20 хамаанда кэлэн кытта сылдьар. Кыттааччылар бэҕэһээ кэлэн, ыйааһыннааһыны ааһан, бүгүҥҥүттэн полуфиналга тахсар иһин икки эргииргэ кииристилэр. Балаһыанньа быһыытынан 2007 с. төрүөх уонна онтон кыра саастаах уолаттар, дьахталларга 2006 с. төрүөх уонна онтон аҕа саастаахтар, эр дьоҥҥо — 2006 с.т. уонна онтон үөһээ саастаахтар, бэтэрээннэргэ 1984 с. т. уонна онтон аҕа саастаахтар диэн ыйааһыннарынан аттарыллан киирсэллэр. Маны таһынан эр дьоҥҥо уонна уолаттарга муҥутуур кыайыылааҕы быһаарыахтара.
Бу Сунтаар улууһугар Аҕам саастаахтарга ытыктабыл сылын чэрчитинэн ыытыллар өрөспүүбүлүкэтээҕи мас-рестлинг күрэһэ бүгүҥҥү үөрүүлээх аһыллыытыгар улуус баһылыга Анатолий Григорьев мустубут дьону бу бэлиэ тэрээһининэн эҕэрдэлээтэ, наҕараадалары туттарда. Салгыы улуус баһылыгын социальнай боппуруостарга уонна имидж политикатыгар солбуйааччы, улуустааҕы мас тардыһыы федерациятын салайааччы Гаврил Еремеев, Элгээйи нэһилиэгин баһылыга Павел Григорьев, Сунтаар нэһилиэгин баһылыгын солбуйааччы Федор Федоров, Арыылаах нэһилиэгин баһылыга Иван Игнатьев, о.д.а. күрэх кыттааччыларын, кэлбит дьону эҕэрдэлээн тыл эттилэр, Виктор Макаровичка өйдөбүнньүк бэлэхтэри туттардылар, мас тардыһааччыларга ситиһиилэри баҕардылар. СӨ успуордун бочуоттаах маастара, биир дойдулаахпыт, Уһун Күөлтэн төрүттээх Виктор Николаев-Хотой Бииктэр бу үбүлүөйдээх 25-с төгүлүн ыытыллар күрэхтэһии Элгээйи нэһилиэгэр ыытылларыттан, онно кэлэн турарыттан олус үөрбүтүн этэн туран, тэрээһиҥҥэ сүүрбүт-көппүт дьоҥҥо махтанна, мас-рестлинг кэнэҕэһин олимпийскай көрүҥҥэ киирэн, бу бүгүҥҥү турниртан тирэх ылан ааттаах-суоллаах спортсменнар үүнэн тахсалларыгар баҕа санаатын эттэ.
Тэрээһини арыйар үөрүүлээх түгэни саха эстрадатын артыыстара, виртуоз-хомусчуттар Дьүрүйээнэ, Владимир Дормидонтов уонна СӨ үтүөлээх артыыһа Александр Дьячковскай-Саарын ситэрэн-хоторон киэргэттилэр.
Салгыы полуфиналга ааһар иһин кытаанах киирсиилэр буоллулар. Мадьынылар күүс былдьаһыыларын улуус мас тардыһыыга федерациятын салайааччыта Гаврил Еремеев иилээн-саҕалаан, этэн-тыынан күрэс былдьаһыы тыҥааһыннаах тыынын сытыырхатан биэрдэ. Ыалдьааччылар мас тардыһааччылар санааларын бөҕөргөтөр ыһыылара-хаһыылара күрэх көҕүн уһугуннарда.
Сарсын, олунньу 18 күнүгэр, бүгүн кыайыы көтөллөммүттэр полуфиналга уонна финалга киирсиэхтэрэ, ону таһынан муҥутуур кыайыылаах аатын ылар иһин күөн көрсүүлэр буолуохтара.
Бүгүҥҥү турниры Элгээйи ТВ ютуб каналыгар https://www.youtube.com/live/9-dwqJHHpk0?si=-JIYuTwZ0Oziwbtg сигэнэн киирэн көрүөххүтүн сөп.
Марфа ИВАНОВА.