Күрэһи Сунтаар улууһун үөрэх управлениета (сал. Васильев Б.Н.), Б.Н.Андреев аатынан Айылҕа түмэлин коллектива (сал. Иванова А.С.), Уйбаан Нуолур аатынан модельнай бибилэтиэкэ (сал. Семенова Т.А.), Элгээйитээҕи успуорт саала (сал. Попов О.А.), «Оһуор» култуура киинэ (сал. Семенов В.Н.) тэрийэн ыыттылар.
Күрэскэ эбэ, эһэ уонна сиэн буолан кытыннылар. Бастакы этабынан Айылҕа түмэлигэр олохтоох бибилэтиэкэ үлэһиттэрэ Семенова Т.А., Елизавета Иванова, Мария Чагдинская «Өркөн өй» оонньуу ыыттылар. Иккис этабынан түмэл саалаларынан эбии үөрэх педагогтара Квест-оонньуу оонньоттулар. Ол курдук, пазл таҥыыта (Яковлева О.М.), кыыллары таайааһын (Иванова Н.П.), тыллары өйдөөн хаалыы (Кириллина К.Г.), үүнээйи сиэмэлэрин таайыы (Иванова А.С.), экспонаттары булуу (Прокопьева С.Н.), көтөрдөр атахтарын таайыы (Герасимова С.М.).
Күрэспит түмүктүүр чааһынан успуорт саалатыгар күрэстэһээччилэрбит курумуу кэтэн эстафеталаан (эпп. Яковлева О.М.), сиэннэр балык хаптаран, онтон эһэлэр уу бэлэмнээн, эбэлэр балык хатырыктаан, үөстээн (эпп. Прокопьева С.Н.) күрэстэстилэр. Салгыы сахалыы ох саанан сыал ытыытыгар кустары, куобахтары табан (эпп. Герасимова С.М.), онтон маамыкта — таба муоһугар обруч киллэрэн (эпп. Гуляев Г.Г., Татаринов Т.Д.) уонна түмүктүүр этапка оскуома саайыытынан күрэхтэһиибит түмүктэннэ (эпп. Иванов Е.И., Егоров Н.Е.).
Күрэспит аһыллыытыгар кэллиэгэбит Геннадий Гуляев алгыстаах тойугунан, «Оһуор» култуура үлэһиттэрэ Айсена, Михаил Федоровтар ылбаҕай ырыаларынан, Евдокия Захарова кылыһахтаах алгыһынан эҕэрдэлээтилэр. Үөрүүлээх чааска нэһилиэкпит баһылыгын эбээһинэһин толорооччу Аркадий Самойлов кэллиэгэбитигэр Терентий Татариновка «Элгээйи нэһилиэгин Бочуоттаах олохтооҕо» бэлиэни туттарда.
Күрэспитигэр дьүүллүүр сүбэҕэ Иванова А.С., Иванова Н.П., Кириллина К.Г. суоттааһынынан үс хамаанда үһүөн тэҥ очукуону ыланнар, хаачыстыба ааҕыытын түмүгүнэн маннык түмүктэр таҕыстылар. Ол курдук, маҥнайгы миэстэни Ульяна, Аркадий уонна Максим Игнатьевтар дьиэ кэргэн кыайыылаах аатын ыллылар уонна Айылҕа түмэлин мецената, Байанайдаах булчут Афанасий Тимофеев-Байанайдаах Бааhынай оҕолоро туруорбут 20.000 солк. уу харчынан наҕараадаланнылар.
Иккис миэстэни Галина, Владимир уонна Айуран Поротовтар-Ивановтар дьиэ-кэргэн ыллылар уонна быйылгы үбүлүөйдээх, 95 сааһын туолбут бары ытыктыыр киһибит, Дьокуускайга сатыы хаамыы салайааччыта, Байанайдаах булчут Григорий Павлов оҕолоро, сиэннэрэ туруорбут 15.000 солк. уу харчынан анал бирииһинэн наҕараадаланнылар.
Үһүс миэстэни Виктория, Андрей уонна Кристина Игнатьевтар дьиэ кэргэн ыллылар уонна Айылҕа түмэлин мецената, быйыл төрөөбүтэ 95 сылынан, аатырбыт хирург-быраас Петр Данилов оҕолоро 10.000 солк. уу харчынан туттардылар.
Ону таһынан анал бириистэри Уйбаан Нуолур аатынан олохтоох бибилэтиэкэ, кадровай булчут, Айылҕа түмэлин мецената Трофим Иванов сиэннэрэ, Анна, Аркадий Чяриннар, Раиса, Анатолий Ивановтар дьиэ кэргэттэрэ, Евгений Павлов туттартаатылар.
Күрэспит кыттааччыларыгар, успуонсардарбытыгар тэрийээччилэр ааттарыттан барҕа махталбытын тириэрдэбит. Куруутун Байанайгыт мичик гыннын, илии тутуурдаах, өттүк харалаах, чэгиэн туруктаах буолуҥ!
Анна ИВАНОВА, Б.Н. Андреев аатынан Элгээйитээҕи Айылҕа түмэлин салайааччыта