Тохсунньу томороон тымныытыгар XXIX төгүлүн ыытыллар В.П.Ларионов аатынан эдэр чинчийээччилэргэ аналлаах «Инникигэ хардыы» научнай-практическай конференцияҕа Б.Н.Андреев аатынан Элгээйитээҕи Айылҕа музейын иитиллээччилэрэ Никита Никитин 6-с кылаас (сал. С.М. Герасимова), Валемир Егоров 10-с кылаас (сал. А.З.Егорова, С.Н. Прокопьева), Аэлита Никанорова 11-с кылаас, (сал. Н.П. Иванова) үрдүк ситиһиилээхтик кытыннылар. Ол курдук, Никита Никитин сайын салайааччытын Сардана Михайловнаны кытары ыыппыт үлэтин «Выращивание утят в домашних условиях» билиһиннэрэн II степеннээх дипломунан уонна Арассыыйа НПК-гар кыттарга мэктиэ суругунан наҕараадаланна.
Наукаҕа саҥа холонон көрөр Валемир Егоров «Создание пластилиновых скульптур фантастических персонажей» үлэтинэн олус үрдүк ситиһиилэннэ, элбэх дьон сэҥээриитин ылан III степеннээх дипломунан наҕараадаланна.
Аэлита Никанорова «Обучающие гиды» по залам Эльгяйского музея природы для изучения многообразия жизни на земле» үлэтинэн кыттан I степеннээх дипломнаах ситиһиитинэн бэйэтин портфолиотун толорон биэрдэ. Аэлита бу күн үөрүүтүн Сунтаарга Аҕа баһылык харыйатын бэлэҕинэн өссө ситэрэн биэрдэ. Кини талбыт үөрэҕэр туттарсан киирэригэр баҕарабыт уонна төрөөбүт дойдутугар кэлэн билиитин-көрүүтүн көрдөрүө диэн эрэнэбит. Оҕолорго уонна салайааччыларга өссө даҕаны ситиһиилэр кэлэ турдуннар. Барарга-кэлэргэ көмөлөспүттэргэ, төрөппүттэргэ барҕа махталбытын тириэрдэбит.
Сардана ГЕРАСИМОВА,
Б.Н. Андреев аатынан Элгээйитээҕи
эрэгийиэннээҕи музейнай экологическай киин эбии үөрэх педагога,
«Эдэр орнитологтар» куруһуок салайааччыта