«Азия оҕолоро» норуоттар икки ардыларынааҕы VIII оонньуулара буолара отой кыра кэм хаалла. Бу оонньуулар түһүлгэлэрэ оҕо сааһы, успуорду уонна эйэни түстүүр сыаллаах буолуохтара. Манна Азия Олимпийскай сэбиэтигэр киирэр 45 дойду, аҥаардас Арассыыйа регионуттан 8 хамаанда кыттара күүтүллэр. Барыта 3000 тахса 16 диэри саастаах эдэр спортсмен успуорт 24 көрүҥэр күөн көрсүөҕэ. Бу улахан күрэхтэhиигэ Саха сирэ икки толору састааптаах хамаанданан киирсиэҕэ.
Сунтаартан «Азия оҕолорун» оонньууларыгар кимнээх кыттыахтарай?
А.И. Иванов аатын сүгэр олимпийскай эрэллэри бэлэмниир өрөспүүбүлүкэтээҕи оскуола аатыттан 13 спортсмен кыттаары бэлэмнэнэ сылдьар. Ол курдук, көҥүл тустууга ыраах Анаабыр улууhуттан үөрэнэ кэлбит оҕобут Николаев Эрхан 62 кг ыйааhыҥҥа өрөспүүбүлүкэ хамаандатын сүрүн састаабыгар киирбитэ (тириэньэрэ – Николай Данилов). Эрхан кэнники кэмнэргэ үрдүк таһымнаах күрэхтэhиилэргэ бэрт ситиhиилээхтик кыттан, уолбутугар эрэлбит улахан.
Инники өттүгэр үгүс ситиhиилэри эрэйэр уолаттарбыт, 52 кг ыйааһыҥҥа киирсиэхтээх Павлов Лёня иккис хамаанда састаабыгар, Данилов Арчын резервэҕэ киирэн сылдьаллар. Тириэньэрдэрэ — Николай Данилов. Уолаттарбыт ааспыт сылтан саҕалаан биэс түһүмэхтээх улахан үөрэтэр-эрчиллэр сбордары аастылар, бу сырыыга аны Алдаҥҥа тиийэн эрчиллиэхтээхтэр. Тустуук кыргыттарбыт Улан-Удэ куоракка тириэньэрдэрэ Герда Данилованы кытта күрэхтэhэ сылдьаллар, ол кэннэ Дьокуускай куоракка түмүктүүр эрчиллиини ааhан, кимнээх кытталлара бүтэhиктээхтик чуолкайданыахтаах. Билиҥҥи туругунан Бүлүүчээнтэн сылдьар Глухарева Айта кыттара бигэргэнэн сылдьар (тириэньэрэ – Николай Охлопков).
Буулдьанан ытыыга Арассыыйа успуордун маастарыгар хандьыдаат, Арассыыйа таhымнаах улахан күрэхтэhиилэр хас да төгүллээх призердара, чөмпүйүөнэ Ераскумова Вика эрэллээхтик өрөспүүбүлүкэ бастакы хамаандатыгар киирбитэ (тириэньэрэ – Александр Николаев). Кыыспытыгар эрэлбит улахан.
Оҕунан ытыыга Дьокуускай куораттааҕы филиалбыт иитиллээччилэрэ, өрөспүүбүлүкэҕэ биллэр охчуттар Ким Владимир, Арассыыйа успуордун маастарыгар хандьыдаат Васильева Айыына (тириэньэр – Балдар Балданов) уонна Сунтаартан Попов Амир (тириэньэрэ – Ньургуяна Петрова) кыттыахтара.
Чэпчэки атлетикаҕа Бүлүү куоратыгар баар филиалбыт 5 иитиллээччитэ кыттыыны ылар чиэскэ тигистэ. Ол курдук, Буслаев Андрей уонна Данилов Владислав бу көрүҥҥэ Бүтүн Арассыыйатааҕы күрэхтэhиилэргэ бириистээх миэстэлэргэ тикситэлээбиттэрэ (тириэньэр Туяра Рожина). Иккиэн «Азия оҕолорун оонньууларыгар» Саха сирин сүрүн хамаандатын чиэhин көмүскүөхтэрэ.
Ыам ыйын түмүктэниитинэн хамаандалар састааптарыгар уларыйыылар өссө да тахсыахтара, чахчы кыттар оҕолор испииhэктэрэ чуолкайданыаҕа, бигэргэниэҕэ. Икки сыл устата кииннээн бары көрүҥнэргэ бэлэмнэнии, эрчиллии күүскэ барда. Онон, оҕолорбутугар үрдүк ситиhиилэри, тулууру, дьулууру баҕарыаҕыҥ. «Азия оҕолорун» оонньууларыттан кынаттанан, эдэркээн спортсмен оҕолорбут улахан күрэхтэhиилэргэ улуустарын, өрөспүүбүлүкэлэрин аатын ааттата туруохтара диэн баҕа санаалаахпыт.
Валентина ПРОКОПЬЕВА
