А.К. Акимов аатынан Күүкэйдээҕи орто оскуолаҕа Арассыыйаҕа Педагог уонна Аҕа сүбэһит сылын түмүктүүр тэрээһин быһыытынан «Весь этот мир творит Учитель!» эдэр педагогтар улуустааҕы бэстибээллэрэ буолан ааста. Бэстибээл үлэлии-хамныы сылдьар эдэр педагогтары дьыалабыай оонньуунан, маастар кылаастарынан, о.д а. тэрээһиннэринэн биир идэлээхтэрин кытта алтыһалларыгар, профессиональнай таһымнарын үрдэтинэллэригэр, уопут атастаһалларыгар туһуланна.
Тэрээһиҥҥэ уопсайа улуус 11 оскуолатыттан 34 эдэр учуутал кытынна. Тэрээһин бастакы этабыгар кыттааччылар 5 хамаандаҕа арахсан «Методическай турнир» диэн дьыалабыай оонньууга күрэстэстилэр. Оонньуу чэрчитинэн үөрэхтээһиҥҥэ, уйулҕаҕа, педагогикаҕа билиилэрин тургуттулар, интеллектуальнай ыйытыыларга хоруйдаатылар. Бэстибээл иккис тэрээһинигэр Күүкэй орто оскуолатын учууталлара маастар кылаастары ыыттылар.
«Методическай турнир» дьыалабыай оонньуу кыайыылааҕынан «Үрдэл» учууталлар холбоһуктаах хамаандалара буолла.
Маны таһынан анал ааттар иҥэрилиннилэр: «Молодое перо педагогики» ааты — «Знатоки», «Эрудированные знатоки» — «Бастыҥнар», «Педагогическая инициатива» — «Сулустар», «Виртуозы взаимодействия» — «Кэскил» хамаандалар ыллылар. Оонньуу ордук көхтөөх кыттааччыларынан Хоро орто оскуолатын учуутала Саян Иванов уонна Хадан орто оскуолатын организатор педагога Ньургуйаана Николаева ааттаннылар. «Яркая звезда» ааты ыллылар.
Улуустааҕы эдэр педагогтар бэстибээллэрэ көдьүүстээхтик, киэҥ ис хоһоонноохтук ыытылынна. Эдэр педагогтар билиилэрин хаҥатан, биир идэлээхтэрин кытта толору алтыһан, сүргэлэрэ көтөҕүллэн тарҕастылар.
«Сунтаар сонуннара» хаһыат