Бүгүн, сэтинньи 21 күнүгэр, Сунтаар улууһун Тэҥкэ нэһилиэгэр «Идэһэ-2024» тэрээһин буолан ааста.
Бу тэрээһин улуус баһылыга Анатолий Григорьев, тыа хаһаайыстыбатын салалтата, Тэҥкэ нэһилиэгин дьаһалтата уонна улуустааҕы Аҕа сүбэтэ түмсүү көҕүлээһиннэринэн ыччаты сылгы иитиитгэр тардар сыаллаах-соруктаах ыытылынна.
Улууспутугар халлаан тымныйан идэһэ астыырга үчүгэй кэм буолла.
Тэҥкэ нэһилиэгин дьаһалтата икки убаһа биэрэн, бааһынай хаһаайыстыбалаах Павел Игнатьев анал сиригэр Сунтаар бастакы нүөмэрдээх оскуолатын 7-10 кылаас үөрэнээччилэригэр хайдах убаһа астанарын, сиэри-туому тутуһары көрдөрдүлэр уонна кэпсээтилэр.
Уолаттар көрөн-истэн, улгумнук ылынан сыпсатык туттан-хаптан убаһаны астыырга көмөлөстүлэр. Ол астаабыт убаһаларын этин үллэрэн дьиэлэригэр биэрэн ыыттылар.
Ону сэргэ сибиэһэй убаһа быара сүрүн бириистээх саанан сыал ытыыга уонна хапсаҕайга күрэхтэһиилэр ытылыннылар.
Оҕолор наһаа интириэһиргээн, түргэнник саҥа билии ылынан, сибиэһэй салгыҥҥа сылдьан олус үөрэн-көтөн, дьиэлэригэр илии тутуурдаах төнүннүлэр.
Дмитрий ЫМЫЧАНОВ