Алтынньы 20 күнүгэр өрөспүүбүлүкэбитигэр Ийэ күнүн бэлиэтээтибит. Бу бэлиэ күнү көрсө Арассыыйаҕа Дьиэ кэргэн сылын чэрчитинэн Бордоҥ нэһилиэгэр Ийэ искибиэрэ үөрүүлээх быһыыга-майгыга аһылынна. Искибиэр ППМИ бырагырааманан тутуллан олоххо киирдэ. Нэһилиэккэ барыта 9 дьоруой ийэ баар. Олортон биирдэстэрин — Мария Семеновна Герасимова аатын искибиэргэ иҥэрдилэр. Искибиэри төрөппүт оҕолоро Петр Герасимов салайыытынан тутан үлэҕэ киллэрдилэр.
Ийэ искибиэригэр үйэлээх оҥоһуу — Мария Семеновна бюһа уонна нэһилиэк дьоруой ийэлэрин кинилэр дьиэ кэргэттэригэр аналлаах истиэндэлэр турдулар. Бу истиэндэҕэ нэһилиэк аҕыс дьоруой ийэтин, оҕолорун туһунан өйдөбүнньүк сүппэттии сурулунна.
Ону тэҥэ «Дьоллоох дьиэ кэргэн» бэлиэтэ тимиртэн композиция турда. Нэһилиэккэ кэлбит ыалдьыттар, олохтоох дьон-сэргэ манна хаартыскаҕа хатанан, сынньанан ааһар бэртээхэй сирэ буолла.
Алена ИВАНОВА