Бүгүн, тохсунньу 27 күнүгэр биир дойдулаахпыт, Арассыыйа уонна ДНР Дьоруойа Дмитрий Егоров төрөөбүт күнүгэр аналлаах линейка Л.Попов аатын сүгэр Арыылаах агро хайысхалаах оскуолатыгар ыытылынна.
Оскуола дириэктэрэ Лидия Никитина Дьоруой аатын үйэтитиигэ ыытыллар үлэлэри сырдатан туран оскуола түмэлигэр Дмитрий Егоровка анаан оҥотторбут стендэни, Арассыыйа Дьоруойун «Кыһыл сулус» мэтээл муляһын, олоҕун, хорсун быһыытын сырдатар буклеты туттарда. Түмэл салайааччыта Елена Ноговицына экспозициялар оннуларын буллахтарына эр санааланыы уруоктара, экскурсиялар ыытыллыахтара диэн эттэ. Биир мүнүүтэ саҥата суох нөрүйэн туран Дьоруойбутун чиэстээтибит.
Биир дойдулаахпыт аата үйэлэргэ ааттаныа, хорсун быһыыта эдэр ыччакка холобур буолуо.
Надежда ПЕТРОВА,
дириэктэри иитэр үлэҕэ солбуйааччы