Арассыыйа уонна ДНР Дьоруойа Дмитрий Егоров – «Сунтаар» төрөөбүтэ 50 сылыгар аналлаах дэкээдэ буойун олохсуйан олорбут, улааппыт сириттэн, Арыылаах нэһилиэгиттэн саҕаланна.
Суолталаах бэлиэ күҥҥэ Дьоруой төрөппүт аҕата Николай Егоров, улуус баһылыгын экэнэмиичэскэй сайдыыга уонна былааннааһыҥҥа солбуйааччы Борис Васильев, Арыылаах нэһилиэгин баһылыга Иван Игнатьев, Сунтаар улууһун байыаннай комиссара Игорь Данилов, улуустааҕы бэтэрээннэр Сэбиэттэрин бэрэссэдээтэлэ Афанасий Васильев, улуустааҕы үөрэҕирии салалтатын салайааччытын солбуйааччы Владимир Уаров уонна ыраахтан-чугастан ыҥырыылаах ыалдьыттар кыттыыны ыллылар.
Дмитрий аатын үйэтитэр сыаллаах тэрээһиҥҥэ «Өтөх төҥүргэстээх, сурт кэриэстээх, оһох кыымнаах» диэн саха өс хоһоонугар ханылыы дьоруой олорон ааспыт алаһа дьиэтигэр мемориальнай дуосканы арыйдылар. Маны сэргэ, үөрэммит оскуолатыгар кини туһунан элбэҕи кэпсиир, анал байыаннай дьайыы кэмигэр хорсун быһыытын сырдатар өйдөбүнньүк истиэндэни үөрүүлээх-быһыыга майгыга арыйдылар. Оскуола көрүдүөрүн кыйа мустубут, байыаннай таҥастаах оҕолор Дьоруой Дмитрий туһунан элбэҕи биллилэр-көрдүлэр. Бу истиэндэ дизайынын Арыылаах орто оскуолатын технологияҕа уонна информатикаҕа учуутала Станислав Ноговицын оҥорбут. Манна буойун туһунан сырдатыыны тэҥэ, кини сырдык мөссүөнэ, грамотата, киниэхэ анаммыт хоһоон, итиэннэ сиһилии кэпсэнэр анал куйаар куот киирбит.
Дмитрий Егоров төрөппүттэрэ кыра эрдэхтэриттэн холкуос, сопхуос, оскуола үлэтигэр эриллэн улааппыт уонна олохторугар үлэни өрө туппут буоланнар, оҕолорун, ол иһигэр Диманы эмиэ тыа сирин үлэтин сатыыр, таптыыр, кыраҕа-кыаммакка көмөлөһөр, дойдуга бэриниилээх буолалларын курдук ииппиттэрэ. Ол иһин Дима олох кыра сааһыттан ыарахантан чаҕыйан турбат, кыаллыа суох диэбэккэ үлэни өрө тутан, дьоҥҥо-сэргэҕэ үтүө холобур буолан кэллэҕэ… Кини дьоһуннаах киһи буола улаатарыгар төрөппүттэрин сэргэ, үөрэммит оскуолата, учууталлара эмиэ кырата суох оруолу ыллахтара. Ол курдук, маҥнайгы учуутала Мария Никитина уонна 5-с кылаастан оскуоланы бүтэриэр дылы үөрэппит учуутала Ксения Кларова буолаллар. Ааспыт сыл атырдьах ыйын 14 күнүнээҕи укааһынан дойду бэрэсидьиэнэ Владимир Путин Ксения Прокопьевнаҕа «За заслуги перед Отечеством» II-с истиэпэннээх уордьаны анаан турардаах. Хорсун буойун Дмитрий аатынан «Доҕордуу сыһыаҥҥа эрэллээх табаарыс» диэн анал истипиэндийэ олохтоммута. Бу истипиэндийэ сүрүн уратыта, оскуола туйгуннарыгар, бастыҥнарыгар эрэ буолбакка, доҕорун туһугар кыһаллар үөрэнээччилэргэ эмиэ туттарыллар. Бүгүн, бу истипиэндийэни 7 кыл. үөрэнээччитэ Дамир Спиридонов уонна 10 кыл. үөрэнээччитэ Айхаан Григорьев Дьоруой аҕатын Николай Алексеевич илиититтэн тутар чиэскэ тигистилэр.
Салгыы, ыччаты өй-санаа, майгы-сигили өттүнэн иитиигэ уонна төрөөбүт дойдуга бэриниилээх буолууга туһуламмыт байыаннай ырыаны, хаамыыны көрүү күрэҕэ буолла. Бу күрэххэ улуус бары оскуолаларыттан уопсайа 14 хамаанда кыттыыны ылла. Маннык байыаннай хаамыы күрэҕэ икки сылга биирдэ ыытыллара былааннанар. Оттон, быйылгы дэкээдэ иитинэн оскуолаларга араас хабааннаах тэрээһиннэр тиһигин быспакка ыытыллыахтара.
Санатан ааһар эбит буоллахпытына, Владивостокка сулууспалаабыт ТОФ 155 гвардейскай биригээдэтин территориятыгар Дьоруойдар аллеяларыгар Дмитрий боруонса бүүһэ турбута. Кэтэ сылдьыбыт шлема, бронижилета, таҥаһа, РФ бэрэсидьиэнин грамотата, Кыһыл Сулус мэтээлин мумията Дьокуускайга «Моя история – Якутск-Россия» музейнай комлпекска туттарыллыбыта. 92Н6А №МЕ2118ПС байыаннай тиэхиньикэҕэ «Дмитрий Егоров» диэн аат иҥэрилиннэ. Ону тэҥэ, кини туһунан элбэх кинигэ таҕыста өссө да тахсыа турдаҕа.
«Миигин солбуйар, ааппын ааттатар икки уоллаахпын. Онон куттанымаҥ, Егоровтары салгыыр уолаттар бааллар. Өскөтүн суох да буолар түбэлтэбэр, элбэх фашиһы анныбар баттаан баран анараа дойдуга барыам…»,
— диэн Арассыыйа уонна ДНР Дьоруойа, хорсун буойун Дмитрий Егоров — Сунтар эппит тыла сурукка-бичиккэ суоруллубаттыы тиһиллэн, үйэттэн-үйэҕэ уос номоҕо буолан кэпсэнэ туруо буоллаҕа.
Елизавета ТИТОВА