Сунтаардааҕы киин балыыһа, муус устар 3 күнүгэр, С.А.Зверев-Кыыл Уолун аатынан норуот айымньытын киинигэр сарсыарда 10:00 чаастан 14:00 чааска диэри олохтоохторго анаан доруобуйа дьаарбаҥкатын тэрийэн ыытар.
Дьаарбаҥка Аан дойдутааҕы Доруобуйа күнүгэр, өрөспүүбүлүкэҕэ Ийэ дойдуну көмүскээччи уонна Сергей Зверев-Кыыл Уола төрөөбүтэ 125 сылларыгар анаан ыытыллар.
Бу күн доруобуйа харыстабылын исписэлиистэрэ: терапевт, эндокринолог, онколог, ЛОР о.д.а көрдөрүнээччи дьоҥҥо босхо сүбэ-ама биэриэхтэрэ. Итини сэргэ харах дабылыанньатын, хаан баттааһынын мээрэйдиэхтэрэ, анаалыс ылыахтара, УЗИ икки көрүҥүн уонна диаскин тест оҥоруохтара. Тыынар уорган, сүһүөх гимнастикатыгар маастар-кылаас көрдөрүөхтэрэ. Хаан баттааһыныгар, уһун үйэлэниигэ араас туһалаах үөрэхтэри уонна фитобар тэрийэн ыытыахтара.
Киин балыыһа үлэһиттэрэ, улуус олохтоохторун түгэни мүччү туппакка, бириэмэни туһалаахтык атааран, доруобуйаҕытын кэлэн көрдөрүнэргитигэр ыҥыраллар.
Елизавета ТИТОВА