«Олорор дьиэ уонна куорат эйгэтэ» национальнай бырайыак чэрчитинэн тупсаҕай эйгэни тэрийиигэ интэриниэт нөҥүө куоластаан Ленин болуоссатын тупсаран оҥорууга үп-харчы ылары ситиһиллибитэ.
Онон билигин улууспут киинигэр саҥардыллан оҥоһуллубут болуоссаппытыгар ким баҕарар астына, дуоһуйа күүлэйдиир.
Манна урукку өттүгэр туран эрэ кэнсиэр көрөр буоллахпытына билигин олорон эрэ бэрт сынньалаҥнык көрөбүт. Олорор сир үрдүк, онон барытын ытыһыҥ үрдүгэр ууран олорон көрөр курдуккун. Үөһэ тахсан Бүлүү эбэбит устарын дуоһуйа көрөбүт.
Болуоссаппытыгар кафе аһыллан, дьон, ордук эдэр, оҕо аймах сөбүлээн сылдьар миэстэтэ буолла. Өссө манна кыра тэрээһиннэри ыытар буолан эрэллэр. Ол курдук, бу аҕыйах хонуктааҕыта Сунтаардааҕы киин бибилэтиэкэ үлэһиттэрэ “Ааҕыы түһүлгэтин” тэрийэн оҕолорго биир үтүө түгэни бэлэхтээбиттэрэ.
Болуоссаппытыгар араас уотунан оонньуур фонтан оҕо дьону угуйар. Куйаас күннэргэ кырачааннарбыт фонтан ыһар уутугар сөрүүкээн төптөрү-таары сүүрэн да биэрдилэр.
Тупсаҕай дизайнаах хачыалларга эдэр дьон сөбүлээн сылдьар, ким аргыый хачыаллыы-хачыаллыы кэпсэтэр, ким кинигэ ааҕар, ким төлөппүөнүн көрөр, ким сынньанар.
Болуоссаппытыгар 2-с оскуола үөрэнээччилэрэ ордубут сибэккилэрэ сиккиэр тыалга аргыый хамсыыллар, симсиһэн күлсэллэр, сарсыардааҕы сииги оймоон сууналлар.
“Ленин болуоссата наһаа үчүгэй буолбут. Биһиги манна кэлэн фонтаҥҥа сылдьабыт. Ардыгар кафеҕа киирэн сок атыылаһан иһэбит. Астык баайы хачыалга олорон хачыаллыыбыт. Өссө роликтаах кэлэммит тэбис тэҥ сиринэн сүүрдэ оонньуубут, великтээхтэр да бааллар”, — диэн ооннньуу сылдьар уолаттар үөрэ кэпсииллэр. “Оҕолорбутун кытары кэлэн күүлэйдиибит. Маннык дьон сынньанар, оҕолорун күүлэйдэтэр тупсаҕай оҥоһуулаах миэстэлэр элбии туралларыгар баҕарабыт. Сотору кэминэн аны экологтар искибиэрдэрэ оҥоһуллуо. Олорор сири тупсаран оҥоруу бырагырааманан оҕо оонньуур былаһааккалара баар буолбуттара, өссө да инникитин элбэх сиргэ былаһааккалар тутуллалларын эрэнэ күүтэбит. Саастаах дьон илиини-атаҕы эрчийэр спортивнай тэриллэрдээх былаһаакка элбэх сиргэ оҥоһуллара буоллар”, — диэн оҕотун дьаарбата сылдьар аҕа санаатын үллэстэр.
Ааптар: Яина Власьева
Дмитрий Петров видеоустуута