Кривошапкин аатынан оҕону дьиэ кэргэҥҥэ иитиигэ көмөнү оҥорор киин сэрэтэр үлэҕэ отделениета XIII бүтүн Арассыыйатааҕы «Добровольцы детям» аахсыйа чэрчитинэн, оҕолорго анаан сайыҥҥы былаһаакканы арыйан үлэлэттэ. Отделение исписэлиистэрэ 10 күн устата араас тэрээһиннэри, аралдьыйыылары толкуйдаан оҕолору сэргэхситтилэр. Сунтаардааҕы кииннэммит бибилэтиэкэ үлэһиттэрэ Иван Мигалкин үлэлэрин билиһиннэрдилэр итиэннэ остуоруйаны куукула тыйаатырыгар көрдөрбүттэрин оҕолор сэргии көрдүлэр. ИДЬО мусуой — хоһун уонна полиция үлэһиттэрин туттар тэриллэрин (бронижилеты, каасканы, аптамааттары) тутан-хабан, кэтэн көрөн астыннылар. Баһаарынай сулууспа уонна ГИМС улэһиттэрэ олус сэргэх, интэриэһинэй экскурсияны ыытан уолаттар баһаарынай буолар баҕаларын эттилэр. С.А. Зверев – Кыыл Уолун аатынан түмэл комплексыгар сылдьан историческай чахчылары, ааспыт үйэ туттар малларын-салларын илэ харахтарынан көрөн сэргээтилэр. Уон күн устата оҕолору минньигэс аһынан-үөлүнэн, бэйэ оҥорон таһаарбыт бородууксуйатынан «Татыйыына» фирма ИП Нина Герасимова спонсорскай өҥөнү оҥорон хааччыйда. Итиэннэ Боходиржон Бабаназаров «Фрукты и овощи» эмиэ спонсордаан оҕолор минньигэс битэмииннээх фрукта арааһын амсайдылар.
Отделения үлэһиттэрэ уон күн устата оҕолор бэйэлэригэр элбэх саҥаны арыйбыттара, интэриэһинэйи билэн-көрөн иҥэриммиттэрэ буолуо диэн бүк эрэллээхтэр.
Валентина АРХИПОВА