Бары билэрбит курдук, үүммүт 2024 сылы дойду бэрэсидьиэнэ Владимир Путин Дьиэ кэргэн сылынан биллэрбитэ. Дьиэ кэргэн — хас биирдии киһиэхэ олус күндү суолталаах өйдөбүл.
Бүгүн эһиэхэ Элгээйи нэһилиэгин биир көхтөөх олохтоох дьиэ кэргэнэ, сайдам ыала Ивановтары билиһиннэрэбит.
— Биһиги, Ивановтар дьиэ-кэргэн: аҕабыт Владимир Владимирович дэгиттэр талааннаах спортсмен, өрөспүүбүлүкэҕэ СахаВА волейболга күрэһигэр «Бастыҥ оонньооччу», мас-тардыһыыга Мииринэйгэ призер.
Ийэбит Анна Серафимовна Элгээйитээҕи Айылҕа түмэлин салайааччыта, нэһилиэк дьокутаата, көхтөөх, уопсастыбаннай үлэһит. Иллэҥ кэмигэр иистэнэрин сөбүлүүр, саахымакка оҕолору үөрэтэр.
Уолбут Сима, аҕатын туйаҕын хатаран, эмиэ волейболга, мас-тардыһыыга улуус призера.
Улахан кыыс Валюша Элгээйитээҕи оҕо искусствотын оскуолатын ырыа уонна үҥкүү отделениетын выпускницата, үөрэх туйгуна, оскуола активистката.
Кыра кыыс Владиана эмиэ үөрэх туйгуна, Элгээйитээҕи оҕо искусствотын уруһуй отделениетын бүтэрбитэ, «Инникигэ хардыы» НПК призера.
Биһиги дьиэ кэргэн бары бииргэ сынньалаҥмытын атаарарбытын, билиибитин хаҥатарбытын, араас успуорт, интеллектуальнай күрэхтэргэ кыттарбытын сөбүлүүбүт. Баҕарабыт үүммүт саҥа сыл барыгытыгар ситиһиилэри, дьиэ кэргэҥҥитигэр дьолу-соргуну, чэгиэн туругу аҕаллын!
#Всейсемьей
«Сунтаар сонуннара» хаһыат.