Өрөспүүлүлүкэбитигэр сахабыт уус-уран литературатын, искусствотын уонна култууратын сырдатар, саха суруйааччыларын бастыҥ айымньыларын ону тэҥэ нуучча уонна омук литератураларын чулуу суруйууларын тылбааһын ааҕааччыга тириэрдэр, ааҕыы абылаҥар угуйар «Чолбон» сурунаал буолар.
Ахсынньыга сурунаал иккис төгүлүн оскуола саастаах оҕолорго уонна улахан дьоҥҥо өрөспүүбүлүкэтээҕи «Истиҥ кэпсээн» күрэһин ыыппыта. Уопсайа 18 улуустан 130 киһи кыттыбыт. Дьүүллүүр сүбэҕэ — СӨ үтүөлээх артыыһа Иннокентий Луковцев, суруналыыс, поэт Ангелина Шадринова-Суоһааны уонна сурунаал эппиэт сэкирэтээрэ Туйаара Павлова үлэлээбиттэр. Күрэскэ айымньы уобараһын ааҕааччыга тириэрдии, тылы сөпкө ыраастык саҥарыы о.д.а. сыаналаммыт. Сүүмэрдиир түһүмэҕи 57 үлэ ааспыт. Олортон улахан дьоҥҥо 42 үлэттэн биир дойдулаахпыт, ытыктыыр кэллиэгэбит, суруналыыс, норуот эмчитэ Айархаана Алексеева кыайыылаах үрдүк аатын ылбыт. 2-с миэстэни Дьокуускай олохтооҕо Сардаана Корякина онтон үһүс миэстэни биир дойдулаахпыт Степан Егоров ылары ситиспит.
Арассыыйаҕа Дьиэ кэргэн сылын түмүктүү сөп түбэһэн, күрэскэ Айархаана, Степан дьиэ кэргэнинэн кыттан бириистээх миэстэҕэ тиксибиттэринэн истиҥник эҕэрдэлиибит.
Алена ИВАНОВА