Бүгүн, ахсынньы 4 күнүгэр, Айти киинигэр Арассыыйаҕа Дьиэ кэргэн, өрөспүүбүлүкэбитигэр Оҕо саас, улууспутугар Аҕам саастаахтарга ытыктабыл сылларынан уонна Сунтаарбыт нэһилиэгэ төрүттэмитэ 260 сылын көрсө «Дьиэ кэргэн олоҕо — нэһилиэк, улуус, өрөспүүбүлүкэ историятыгар» диэн быыстапка үөрүүлээхтик арыылынна. Бу маннык үтүө тэрээһини Оҕо дьоҕурун сайыннарар киин кэлэктиибэ (салайааччы Ангелина Антонова) иилээн-саҕалаан тэрийдилэр.
Бу быыстапка Сунтаар улууһун норуотун маастара Афанасий Герасимов дьиэ кэргэнин туһунан кэпсиир.
Кини төрөппүттэрэ Муза Николаевна уонна Афанасий Кириллович Герасимовтар биһиги Сунтаарбытыгар ытыктанар, 6 оҕону төрөппүт биир киэн туттар дьиэ кэргэн быһыытынан биллэллэр. Афанасий Кириллович Сунтаар улууһугар 30 сыл райсобеһы Пенсионнай департамент буолуор диэри өр сылга ситиһиилээхтик салайбыта. Кинилэр элбэх оҕону төрөтөн, үөрэхтээн, уопсастыбаҕа бэйэлэрин миэстэлэрин булар дьону иитэн таһаарбыттара, дьоҥҥо-сэргэгэ үтүө холобур быһыытынан буолар.
Быыстапкаҕа Афанасий Афанасьевич төрүтчүтүн 8 көлүөнэтин, барыта 811 киһи дааннайдарын уонна хаартыскаларын булан, сүрдээх баай ис хоһоонноох матырыйаалы көрдөрөр.
Быыстапка ахсынньы 4 күнүттэн 6 күнүгэр диэри көрдөрүүгэ туруоҕа, онон дьон-сэргэ көрөн астыныаҕа, элбэх дьон хараҕын үөрдүөҕэ.
Дмитрий ЫМЫЧАНОВ