Итинник ааттаах дьоро киэһэ кэнсиэрин көрөөччүлэргэ Дуолан кэргэнэ Аниталыын бэлэхтээтилэр. Ахсынньы 9 күнүгэр тымныыбыт арыый да уостан, тумана көтөн, халлааммыт кыраадыһа биллэ түһэн, арыый да тыын ыла түстүбүт. Айылҕа бэйэтэ маанылаан, тымныытын тыына арыый да уҕараабыт күнүгэр Дуолан, Анита Трофимовтар кэнсиэртэрин көрөн олус сэргэхсийдибит. Көрөөччү икки кэнсиэригэр тобус-толору сырытта, ытыс тыаһа сөҕүрээбэтэ. Көрөөөччү олус астынна. Бу иннинэ ааспыт икки сылларга Дуолан айар кэнсиэрин, учууталлара Мария Семенова эмиэ айар түһүлгэтин көрбүппүт. Үгүстэр кэнсиэртэригэр, баҕар, уларыйыы суох ини дии санаабыттара буолуо. Бу сырыыга Анита, Дуолан кэнсиэртэрэ ааспыт сылларыгар хатыласпата, ураты сылаас тыыннаах, икки ырыаһыт дьиэ кэргэн айар түһүлгэтэ үрдүк таһымнаахтык ааста. Иккиэн да ырыаһыт быһыытынан сиппит, көрөөччүнү ураты тардар дьоҕурдаах артыыстар буолалларын бигэргэттилэр. Хас биирдии ырыалара ураты сылаас тыыннаахтар. Биирдиилээн да толорор ырыалара, иккиэн да толоруулара олус кэрэ, астык. Куоластара да мааны, толорууу маастарыстыбатын толору баһылаабыт ырыаһыттар. Онон Дуоланнаах аныгыскы кэнсиэртэригэр эмиэ кэлиэхпит диэн, үгүс көрөөччү санаатын үллэһиннэ.
Аниталаах Дуолан быйылгыттан Түбэй-Дьаархан култууратын дьиэтигэр ананан үлэлии сылдьаллар. Дуолан култуура дириэктэринэн, Анита айар салайааччынан ананан үлэлии сылдьаллар. Бу дьоро күн иккис кэнсиэригэр иккиэннэригэр СӨ култууратын туйгуна аат иҥэриллибитин, норуот ытыс тыаһынан уруйдаата-айхаллаата. Анита 50-тан тахса айар ырыалаах сиппит мелодист эбит. Евровидениеҕа оҕо сылдьан кытталларыгар Анита «Ардах» диэн ырыатынан кыттан, оҕолор улахан түһүлгэҕэ биһирэммиттэрэ. Ол да ырыаларын «Домисольки» оччотооҕу ырыаһыттара ыллаан үөртүлэр.
Дуолан үгүс хит буолбут ырыалара Сиэн Тиитэп матыыбыгар, ону кини кыайа-хото тутан толорор.
Өссө биир үөрүүлээҕэ — учууталлара Мария Семенова быйыл күһүҥҥүттэн куоракка кэлэн үлэлии сылдьар. Икки ый эрчийбит оҕолоро — үс бөлөх ансаамбыл тахсан сүрэхтэннилэр. Кэнсиэргэ СӨ үтүөлээх үлэһитэ Фрументий Сафронов Дуоланныын бииргэ ыллаан, көрөөччүлэри астыннардылар. Талааннаах ырыаһыппыт куолаһа чөллөркөйө сөхтөрдө.
Онон сулустаах дьиэ кэргэн кэнсиэрин көрөөччүлэригэр бэлэхтээбит Анита, Дуолан Трофимовтарга махтал бастыҥын аныыбыт. Көрөөччүлэргитин өссө да үөрдэ туруҥ!
Марта НИКОЛАЕВА.