Арассыыйаҕа Дьиэ кэргэн, өрөспүүбүлүкэҕэ — Оҕо саас, улууспутугар — Аҕам саастаахтарга ытыктабыл сылларын чэрчитинэн С.А.Зверев-Кыыл-Уолун аатынан норуот айымньытын киинигэр «Дьиэ кэргэн дьоло — кэскиллээх кэнчээри ыччатыгар» улуустааҕы элбэх оҕолоох дьиэ кэргэн күрэһэ буолла.
Куоҥкурус элбэх оҕолоох дьиэ кэргэни түмэр, пропагандалыыр уонна сыаннастарын үрдэтэр, уопсастыбаҕа дьиэ кэргэн тутулун бөҕөргөтөр, элбэх оҕолоох ыаллар оҕону иитэр уопуттарын тарҕатар соруктаах ыытылынна. Күрэскэ барыта 6 дьиэ кэргэн кытынна. Ол курдук, Кэмпэндээйиттэн 5 оҕолоох саха сайдам ыала Эдуард, Лира Герасимовтар. Уһун Күөлтэн 5 оҕолоох үүнэр-сайдар кэскиллээх Иван, Варвара Тихоновтар. Аллыҥа нэһилиэгиттэн 8 оҕолоох, үтүө-мааны Сулус, Арина Осиповтар. Хороттон 10 оҕолоох саха мааны ыала Лев, Варвара Николаевтар.
Элгээйиттэн 6 оҕолоох, кэрэни кэрэһилиир Афанасий, Надежда Саввиновтар. Бордоҥтон 5 оҕолоох, иллээх-эйэлээх Вячеслав, Елизавета Ноевтар. Дьиэ кэргэттэр куоҥкурус түһүмэхтэринэн бэйэлэрин билиһиннэрдилэр, кистэлэҥ талааннарын, араас дьоҕурдарын арыйан көрдөрдүлэр, дойдуга бэриниилээх буолууга ис хоһоонноох ырыаны ыллаатылар, хоһоону аахтылар, төрүччүлэрин быыстапкатын, хаартысканан презентацияларын көмүскээтилэр. Күрэс түмүгүнэн III миэстэ- Эдуард Лира Герасимовтар, II миэстэ — Сулус, Арина Осиповтар буоллулар. Оттон кылаан кыайыылааҕынан Иван, Варвара Тихоновтар буолан өрөспүүбүлүкэҕэ ыытыллар күрэскэ улууспут аатын көмүскүүр чиэскэ тигистилэр.
Талааннаах, айар-тутар дьоҕурдаах, холобурга сылдьар дьиэ кэргэттэри көрөн дьон-сэргэ олус астынна. Элбэх оҕолонор дьол буоларын сэҥээрэ, кэрэхсии көрдө.
Алена ИВАНОВА