Ааспыт нэдиэлэҕэ нэһилиэкпит тэрилтэлэрин эр дьоно уонна 8-с кылаас үөрэнээччилэрин уолаттара күүстээх субуотунньук тэрийдилэр. Ол курдук, «Ойбон күөлтэн» муус ылан нэһилиэк кырдьаҕастарыгар, анал байыаннай эпэрээссийэҕэ сылдьар уолаттар дьонноругар, оскуола бэтэрээн учууталларыгар, барыта холбоон 20 – тэн тахса ыалга муус тиэйилиннэ. Күргүөмнээх үлэ быыһыгар олохтоох дьаһалта кэрэ аҥардара балаҕаҥҥа итии чэйинэн, саҥыйахтаах алаадьыннан, үтэһэлээх этинэн айах туттулар. Нэһилиэк баһылыга, Петр Тимофеев, салайыытынан кыстыкка бэлэмнэниигэ бэрт туһалаах күн ааста.
Станислав ГОЛЬДЕРОВ
Дьаархан