«Дьаархан айар ыллыктарынан» бырайыагы 2021 с. Дьаархан оскуолатыгар нуучча тылын, литературатын учууталынан үлэлээбит Августина Попова уонна олохтоох бибилэтиэкэ буолан толкуйдаан оҥоһуллубута. Бу бырайыакка билигин 8-с кылааһы салайар Владимир Николаев ситимин быспакка үлэлэһэ сылдьар.
Сэтинньи 14 күнүгэр Тээттиир-Чуукаар-Куоһаан хайысхатынан төрөппүттэр, оҕолор буолан краеведческай походка баран кэллибит. Бастакы тохтобулбут Тээттииргэ буолла. Манна оҕолорго 1936-1954 сс. “Тээттиир” диэн ааттаах, ким да олорботох сиригэр 18 сыл устата үэлээбит оскуола кэрчик кэмин сырдаттыбыт, билиһиннэрдибит. Дьаархан оскуолатын историятын, бастакы оскуоланы ким аспытын оҕолор биллилэр диэн эрэнэбит. Иккис тохтобулбут балачча улахан бөһүөлэк буола сылдьыбыт Чуукаарга буолла. Чуукаарга Аҕа Дойдуну көмүскүүр Улуу сэриигэ ыҥырыллан барбыт, эргиллэн кэлбит уонна тыыл бэтэрээннэригэр анаммыт өйдөбүнньүк бэлиэҕэ сырыттыбыт. Үһүс тохтобулбут Куоһаан буолла. Манна эмиэ Куоһаан сириттэн-уотуттан барбыт буойуттарга анаммыт өйдөбүнньүк бэлиэҕэ сылдьан, биир дойдулаахтарбытын ахтан-санаан аастыбыт.
Бу сырыы оҕолорго умнуллубат өйдөбүл буолан хаалла диэн эрэнэбит. Оҕолор олус астыннылар, аныгыскы сырыыга өссө да атын сирдэргэ барыахтарын баҕаралларын эттилэр. Түгэнинэн туһанан нэһилиэкпит баһылыгар Петр Тимофеевка, сыыдам сырыылаах суоппарбытыгар Алексей Семеновка барҕа махтал тылларын аныыбыт!
Анна НИКОЛАЕВА