Бүгүн, ахсынньы 11 күнүгэр, С.А.Зверев-Кыыл Уолун аатынан норуот айымньытын киинигэр «ЧЫПЧААЛ — 2024» тэрээһин буолан ааста. Саала ыалдьыттарынан туолан, наҕараадалааһын сиэрэ-туома буолла. Бастыҥ спортсменнарга эҕэрдэ суруктары, наҕараадалары, бэлэхтэри туттардылар.
Ол курдук, 2024 сыл түмүгүнэн, «Бастыҥ спортсмен» анал ааттары ыллылар: көҥүл тустууга: Лев Павлов, Юлиан Григорьев, Юрий Винокуров. Оҕунан ытыыга: Мария Тараярова уонна Рената Гаврильева. Стендовай ытыыга: Петр Егоров. Сүүрүүгэ: Наталья Леонтьева, Полина Слободчикова. Боксаҕа: Валерий Егоров, Михаил Варламов.
Ону сэргэ, сыл устата нэһилиэктэр ыккардыларыгар ыытыллыбыт комплекснай спартакиада түмүгэ билиннэ. Ол курдук, кыра нэһилиэктэр ыккардыларыгар 3-с үрдэли Устье, 2-с үрдэли Күүкэй уонна бастакы үрдэли Түбэй ыллылар.
Оттон орто нэһилиэктэргэ 3-с үрдэли Аллыҥа, 2-с үрдэли Маар Күөл, бастакы үрдэли Бүлүүчээн ыллылар.
Улахан нэһилиэктэр ыккардыларыгар Сунтаардааҕы «Сомоҕо» түөлбэ 3-с үрдэли ылла, 2-с үрдэли Тойбохой нэһилиэгэ уонна бастакы үрдэли Кутана нэһилиэгэ.
Сунтаарбыт спортсменнарыгар кэлэр сыл дөссө элбэх ситииһиилээх, кыайыылаах-хотуулаах буоларыгар эрэнэбит.
Дмитрий ЫМЫЧАНОВ