Кулун тутар 15,16,17 күннэригэр дойду бэрэсидьиэнин талар быыбарга Сунтаар улууһун олохтоохторо көхтөөхтүк кытыннылар. Улуус быыбардыыр 31 учаастагар 14504 быыбардааччы баарыттан 10417 киһи быыбарга кытынна. Баһыйар элбэх куолаһы дьон Владимир Путиҥҥа биэрдэ – 90,66%. Дойдуну салайар улахан эппиэтинэстээх үлэҕэ, бэрэсидьиэни талар быыбарга дьон туохха олоҕуран, туох санаанан салайтарбытын билсиэххэйиҥ.
Семен Николаев, Сунтаар нэһилиэгин дьокутаата:
– Дойдубут бэрэсидьиэнин талар быыбар кэннинээҕи санаам: Сунтаар нэһилиэгин, улууһун олохтоохторо Владимир Путины өйүүрбүтүн көрдөрдүбүт. Мин өйдүүрбүнэн ханнык да быыбарга ким даҕаны маннык улуус үрдүнэн нэһилиэнньэ 90-нтан тахса бырыһыанын өйөбүлүн ылбатаҕа. Сунтаар нэһилигэр 89,79 бырыһыаны ылбыта эмиэ улахан нэһилиэккэ үрдүк көрдөрүү. Тоҕо дьон маннык куоластаата диир буоллахха, мин санаабар, Сунтаар нэһилиэгэр кэнники сылларга Владимир Путин көҕүлээһининэн үлэлиир федеральнай, национальнай бырайыактарынан үгүс үлэ барда. Дьон-сэргэ тыа сирэ сайдарыгар болҕомто күүскэ ууруллар буолбутун бэлиэтии көрөн, Владимир Владимирович ыытар политиката кэскиллээҕин, сөптөөҕүн сыаналыырын биллэрдэ дии саныыбын.
Кэнники сылларга ыытыллыбыт үлэлэри, бу Сунтаар нэһилиэгэр холобурдаан этэр буоллахха, “Олорор дьиэ уонна куорат эйгэтэ” национальнай бырайыак чэрчитинэн үлэлиир “Куорат тупсаҕай эйгэтин олохтооһун” тосхолунан Ленин болуоссата тупсарыллан оҥоһуллубута. Билигин бу болуоссат уруккуга холоотоххо тосту уларыйан дьон-сэргэ сынньанарыгар олус табыгастаах биир кэрэ миэстэнэн буолла. Бу бырагыраамаҕа киирэн “Экологтар сквердэрэ” тутулунна. Маны сэргэ федеральнай тосхолунан Сунтаар түөлбэлэрин уулуссалара бары кэриэтэ лаампа уотунан сырдаатылар. “Ыраас уу” федеральнай бырайыагынан ууну ыраастыыр станцияланныбыт. “Уһук Илиҥҥэ 1000 тиэргэн” бырагырааманан үгүс былаһаакка тутулунна.
Дьон-сэргэ тыа сирэ маннык федеральнай бырайыактарга хабыллар, куоҥкурустарга кыттан кыайан, олох-дьаһах тупсарыгар федеральнай үбүлээһини ылар кыахтаммытын бэлиэтии көрбүт буолуохтаах. Бу Владимир Владимирович көҕүлээһининэн үлэлиир бырайыактар көдьүүстээхтик үлэлииллэрин туоһута. Уонна, уопсайынан, дойду үрдүнэн Владимир Путин салайар сылларыгар экономика өттүгэр стабильность баар буолла диэн этэр оруннаах. Бу быыбар түмүгэ, мин санаабар, нэһилиэнньэ үрдүк сыанабылын көстүүтэ.
Трофим Иванов, Сунтаар улууһун ыччат отделын салайааччыта:
— Бу ааспыт бэрэсидьиэни талар быыбарга Владимир Путин эрэллээхтик кыайда. Сунтаар улууһун ылан көрөр буоллахха, Владимир Владимирович кандидатуратын быыбардааччы 90,66%-на өйөөтө. Бу норуот киниэхэ лидер быһыытынан эрэлин, итэҕэлин туоһута диэн сыаналыыбын. Билиҥҥитэ өрөспүүбүлүкэбит сайдарыгар федеральнай өттүттэн өйөбүл да, болҕомто да баар диэххэ сөп. Нэһилиэнньэ олоҕо тупсарыгар элбэх үлэ барар. Урут баараҕай тутуулар биир үксүн куораттарга эрэ тутуллар буоллахтарына, билигин улуус кииннэригэр куорат тутууларыттан туох даҕаны итэҕэһэ суох тупсаҕай дьиэлэр тутуллар буоллулар. Ол курдук тэрилтэ дьиэлэрин тутууну таһынан, «Хаарбах уонна саахалланар туруктаах дьиэттэн дьону көһөрүү» бырагырааманан тыа сиригэр дьон олорор дьиэтин тутуу үлэтэ үгүстүк ыытылынна. Кэнники сылларга олохпут үтүө өттүгэр уларыйыытын таба сыаналаан, бу ааспыт быыбарга дьон үксэ эрэбиллээх, сатабыллаах салайааччы буоларын үлэнэн көрдөрбүт Владимир Путиҥҥа биэрдэ дии саныыбын.
Николай Лидочен, Ыччат отделын сүрүннүүр исписэлииһэ:
— Арассыыйа бэрэсидьиэнин талар быыбарга нэһилиэнньэ баһыйар өттө кэскиллээҕи толкуйдуур, дойдуну хас да сыл сатабыллаахтык салайбыт Владимир Путины өйөөтө. Саха сирэ эмиэ атын регионнар курдук бэрэсидьиэн дуоһунаһыгар кинини талла.
Сахабыт сирэ кэнники сылларга экономическай сайдыыта дойдуга инники күөҥҥэ сылдьар. Элбэх тутуу барар, суол-иис тупсар, сибээс-ситим күүһүрэр. Манна дьон олоҕо тупсарыгар үлэлиир федеральнай да, өрөспүүбүлүкэтээҕи да араас хабааннаах бырагыраамалар, бырайыактар оруоллара улахан. Дойдубут сайдарыгар федеральнай өйөбүл баарын, олохпут кэнники сылга биллэ тупсубутун сыаналаан, дьон бу быыбарга тус санаатын биллэрдэ дии саныыбын.
Марфа ИВАНОВА