Бырааска көрдөрөргө билигин хайдах суруттарыахха сөбүй?

Сунтаардааҕы киин балыыһа билигин бырааска хайдах суруттарыахха сөбүн улууспут олохтоохторугар бу курдук быһаарар:

-Сунтаар киин балыыһатын иһинэн биир кэлим Call-центр үлэлиирин санатабыт. Медицинскэй көмө боппуруостарыгар, оҕо уонна улахан дьон поликлиникатын быраастарыгар, дьахтар консультациятыгар, стоматологияҕа, улахан дьоҥҥо чэпчэтиилээх рецептэри суруттарарга, ону сэргэ эмчити дьиэҕэ ыҥырарга, вакцинацияҕа, уонна диспансеризацияны ааһарга биир кэлим нүөмэргэ эрийэгит-122, онтон 2 сыыппараны баттыыгыт.

Үлэлиир кэмэ: бэнидиэнньик-бээтинсэ, сарсыарда 08:30 чаастан 16:30 чааска диэри эбиэтэ суох үлэлиир.

Колл –центр үлэһиттэрэ 8 (411) 239-83-00 нүөмэртэн эрийэн бырааска диспансеризацияҕа кэлэргитин санатыахтара, араас мунаахсыйар ыйытыыларгытыгар эппиэттиэхтэрэ. Бу нүөмэри төлөпүөҥҥүтүгэр хайаан да сурунан хаалларыҥ диэн сүбэлиибит. Ону таһынан, нэһилиэнньэҕэ табыгастаах буоллун диэн бырааска суруйтарыы
атын көрүҥнэрэ бааллар:

1. Инфомат нөҥүө.
Улахан киһи уонна оҕо поликлиникаларыгар бастакы этээскэ бырааска суруттарар анал икки инфомат үлэлиир.
Приемҥа суруттараары уһун уочаракка турбакка, хаһан баҕарар кэлэн инфоматынан бырааска суруттарыахха сөп. Манна паспорт эбэтэр медицинскэй полис нүөмэрдэрэ наада буолар.

2. «К врачу» диэн мобильнай сыһыарыы. Босхо төлөпүөҥҥэ хачайданар. Дьиэ кэргэн биир төлөпүөнтэн суруттарыан сөп.

3. «Госуслуги» судаарыстыбаннай портал нөҥүө суруттарыы.

Онтон тыа сиригэр олорор киһи ыалдьар түгэнигэр аан бастаан бэйэтин биэлсэригэр эбэтэр бырааһыгар хайаан да көрдөрүнэн баран, оройуон киинигэр тустаах бырааска направление ылар, «К врачу», «Госуслуги» нөҥүө приемҥа суруттарар.

«Сунтаар сонуннара» улуус хаһыата