Сунтаар улууһун биир уһук нэһилиэгэр — Бүлүүчээҥҥэ ыраастаммыт уу ситимэ олохтоохторго уонна тэрилтэлэргэ киирдэ.
Бу олохтоохторго сүрдээх долгутуулаах бэлиэ күнү алгысчыт Ньургустаана Татаканова аал уокка айах тутан арыйда. Улуус дьаһалтатыттан баһылыгы экономическай сайдыыга уонна стратегическай былааннааһыҥҥа солбуйааччы Борис Васильев, ОДьКХ ГУТ Сунтаардааҕы филиалыттан дириэктэр Михаил Петров, филиал үлэһиттэриттэн уонна нэһилиэк баһылыга Сергей Барамыгин күүтүүлээх үлэ түмүктэнэн, олоххо киирбитинэн эҕэрдэлэрин тириэртилэр.
Санатар буоллахха, ыраастаммыт уу ситимэ СӨ кэлэр көлүөнэлэр пуондаларын нөҥүө «2019-2024 сс. Бүлүү бөлөх улуустарын уунан хааччыйыы систиэмэтин сайыннарыы” диэн тус сыаллах бырагыраама чэрчитинэн олоххо киирдэ.
Бу үөрүүлээх күн Бүлүүчээн нэһилиэгэр 34 ыал уонна 8 тэрилтэ ыраас уу ситимигэр холбонно.
Ону эбии ГУТ ОДьКХ «ПЧС» (подключение частного сектора) анал бырагырааматынан быйыл нэһилиэк 9 ыала киин ититиигэ холбонно.
ОДьКХ улуустааҕы филиалын үлэһиттэрэ чопчу бу бырагыраамаҕа аан бастакытын үлэлээн, сайын устата 3608 м тымныы уу ситимэ тардылынна.
Тэрээһин кэмигэр ситими тардыыга үлэлээбиттэргэ махтал суруктар, наҕараада туттарылынна. Олортон холобур, улуус социальнай-экономическай сайдыытыгар кылаатын иһин бэлиэни Кирилл Барамыгин, Сим Алексеев, оттон Анатолий Никифоров, Александр Максимов Бочуотунай грамотаны туттулар. Нэһилиэк баһылыга Сергей Барамыгин ОДьКХ Бүлүүчээннээҕи учаастагар (маастар С.А.Алексеев) «Маяк» маҕаһыынтан 10 тыһ.суумалаах туоһу суругу туттарда.
Саамай үөрбүт-көппүт нэһилиэк аҕам саастаахтара. Кинилэртэн холобур, бу иннинэ оһоҕунан, бойлерынан олорбут Наталья Васильевна Михайлова киин ититиигэ холбонуу, ыраас уу ситимэ тардыллыбыта олоҕу-дьаһаҕы чэпчэтэр уонна ыраастаммыт уунан хааччылыы киһиэхэ саамай сүрүн кыһалҕанан буоларын бэлиэтиир. Мантан инньэ ыаллар абыранар буоллубут диэн үөрүүтэ үгүс.
Айархаана АЛЕКСЕЕВА