Буруоттан хайдах харыстанабыт?

Нэһилиэнньэлээх пууннар буруонан бүрүллэр түгэннэригэр, ордук итии күҥҥэ, таһырдьа сылдьыыны уонна физическэй ноҕуруусканы аҕыйатар ордук.

Итиигэ киһи элбэхтик көлөһүннүрэриттэн эт-сиин элбэх убаҕаһы сүтэрэр, онон элбэх ууну иһиэххэ наада.

Эккэ-сииҥҥэ туус уонна микроэлеменнэр тиийбэт буолууларын толуйан, кыра туустаах, минераллаах ууну, үүт аһы иһэргэ, гаастаах утаҕы тохтоторго сүбэлиибит.

Иҥэмтиэлээх уонна битэмииннээх аһылыкка болҕомто ууруллуохтаах.

Маны таһынан, тыынар уорганнары буруоттан харыстаан мааска кэтэр, респираторы туһанар ирдэнэр, дьайыытын күүһүрдэр сыалтан кэмиттэн-кэмигэр сиигирдэн биэрэр наада.

Түннүк, аан быыһын инчэҕэй таҥаһынан бүрүйүөххэ сөп, маннык кэмҥэ кондиционерынан туһанар ордук.

Буортулаах эттиктэртэн ыраастаан дьиэни күн аайы быыллыы-сото сылдьыаха, итииттэн харыстанарга уонна киһи хараҕар көстүбэт умайыы эттиктэрин тирииттэн суох оҥорорго күҥҥэ хаста да суунарга сүбэлиибит.

Табахтыыртан, аһыы утаҕы уонна пиибэни иһэртэн аккаастанарга этэллэр.

Ыарыы сибикитэ билиннэҕинэ (сэниэтэ суох буолуу, мэйии эргийиитэ, тыын тиийбэт буолуута, сөтөл, утуйбат буолуу) тута бырааска көрдөрөр туһааннаах.

 

Сунтаардааҕы киин балыыһа ыарыыны эрдэттэн сэрэтэр кэбиниэтэ

Читайте дальше