Ааспыт нэдиэлэ бүтүүтүгэр Дьокуускай куоракка өрөспүүбүлүкэ волейболга кулууптарын икки ардыларыгар улахан күрэхтэһии буолан ааспыта. Манна биһиги улууспут 45 саастарыттан үөһэ саастаах эр дьоно уонна дьахталларын хамаандалара баран ситиһиилээхтик оонньоон кэллилэр.
Ол иннинэ саас Бүлүү бөлөх улуустарыгар финалга оонньуурга путевка ылар иһин күрэхтэһии тэриллибитэ. Онно биһиги улууспут икки хамаандата иккиэн путевка ылары ситиспиттэрэ. Дьэ, бу улахан сытыы киирсиилээх күрэхтэһиигэ ылбыт путевкаларын сокуоннайдык дакаастаатылар диэххэ сөп.
Ол курдук, өрөспүүбүлүкэ ааттаах-суоллаах волейболистарын күрэхтэһиилэригэр Сунтаар кэрэ аҥаардарын хамаандата үһүс бочуоттаах миэстэни ылла. Оттон хамаанда чилиэнэ Анжелика Тихонова «Лучший защитник» диэн анал ааты чиэстээхтик сүктэ. Лена Петрова хапытааннаах хамаандаҕа АнжеликаТихонова, Марина Попова, Кира Евсеева, Эмма Васильева, Нюргуяна Селляхова, Мария Осипова, Мария Егорова уонна Дьокуускай куоракка олорор Ася Тукайнова Ася, Алевтина Егорова бааллар.
Оттон эр дьоммут 6 хамаандаттан түөрдүс миэстэни ылары ситистилэр.
Волейболистар бу күрэхтэһиигэ баран кытталларыгар улахан көмөнү оҥорбут дьонноругар, чуолаан волейбол улуустааҕы федерациятын бэрэссэдээтэлигэр Николай Егоровка, А.И.Иванов аатынан олимпийскай эрэллэри бэлэмниир спортивнай оскуола дириэктэрэ Павел Павловка уонна суоппар Алексей Архангельскайга махталларын тириэрдэн туран, саҥа үүнэр сыл үгүс ситиһиилэрдээх буоллун диэн алгыстарын этэллэр.
Яина ВЛАСЬЕВА