Олунньу 19 күнүгэр “Айыллаан” СКК Саха сиригэр пионерия төрүттэммитэ 100 сылыгар аналлаах “Пионерскай сбор” ыытылынна. Саха сирин пионерскай тэрилтэтин үөскээбит күнүнэн 1924 сыл олунньу 17 күнэ ааҕыллар. Ити күн РК(б)П партия обкомун дьиэтигэр пионердар бастакы тэрээһин мунньахтара (сбордара) буолбута. Бу мунньахха сүүрбэччэ оҕо пионерга киирэн, «Спартак» диэн пионер этэрээтэ тэриллибитэ. Пионердар сүрүн атрибуттарынан барабаан уонна кыhыл хаалтыс буолара. Хаалтыс үс муннуга үс көлүөнэ быстыбат сибээhин көрдөрөрө: коммунистар, комсомолецтар уонна пионердар.
Хас биирдии аҕа саастаах киһиэхэ урукку кэм историята өйүгэр-санаатыгар умнуллубат үтүө түгэн буолан хатанан хааллаҕа. Пионерга киириини элбэх киһи оҕо саастарын саамай умнуллубат үтүө өйдөбүлэ гынан илдьэ сылдьар буолуохтаахтар. Бу күн аалай кыһыл хаалтыс кэтэн, горн, барабаан ньиргиэрдээх тыаһынан пионер кэккэтигэр сылдьыбыт саастаах дьоммутугар үөрүүлээх линейкаҕа “Айыллаан” кулууп үлэһиттэрэ “Пионер доҕорбут!” эҕэрдэ открыткаларын туттартаатылар. Линейкаҕа рапортарын, девизтэрин, пионерскай андаҕардарын ахтан-санаан ыллылар, пионерскай знамя киирэрин көрүстүлэр. Урукку кэми санатар астаах остуол тула олорон викторинаҕа, көрдөөх оонньууларга кытыннылар. Хаһыаттан пилотка оҥостон кэтэн хаартыскаҕа хатаннылар. Пионер буола сылдьыбыт оҕо саастарын истиҥник санаан киэн тутта кэпсээтилэр. Кылаас, оскуола нэhилиэк уопсастыбаннай олоҕор көхтөөхтүк кытталларын бэлиэтээн эттилэр. Ол кэмтэн элбэх сыл-хонук ааста эрээри, оҕо саас саамай умнуллубат түгэнин пионерга киириини олус истиҥник саныыллар.
Виктория ЛУКИНА