Кулун тутар 2-3 күннэригэр Бордоҥ нэһилиэгэр СӨ үтүөлээх култууратын үлэһитэ, Бордоҥ нэһилиэгин бочуоттаах олохтооҕо Василий Спиридонов-Байанайдаах Баһылай бирииһигэр бильярд турнира үрдүк таһымнаахтык буолан ааста. 14-с төгүлүн ыытыллар турнирга 3 улуустан Бүлүүттэн, Үөһээ Бүлүүттэн уонна Сунтаартан барыта 53 бильярдист кытынна.
Икки күннээх оонньуу түмүгүнэн кыайыылаахтарынан буоллулар: эдэрдэргэ: I м. — Гай Николаев (Бүлүү), II м. — Артур Захаров (Бүлүү), III м.- Дьулус Контогоров (Сунтаар-Кириэстээх), Василий Третьяков (Үөһээ Бүлүү). Бэтэрээннэргэ: I м. — Николай Иванов (Үөһээ Бүлүү), II м. — Юрий Федоров (Үөһээ Бүлүү), III м. — Артур Томский (Үөһээ Бүлүү), Александр Егоров (Үөһээ Бүлүү). Олимпийкаҕа киирбит Вячеслав Омуков, Сергей Матвеев, Прокопий Николаев, Валерий Николаев эмиэ бириискэ тигистилэр. Ону таһынан «За лучшую серию забитых шаров» — Василий Третьяков анал бириис ылла. Чөмпүйүөн лиэнтэтинэн, кубоктарынан, сыаналаах бириистэринэн наҕараадаланнылар.
Бу күн аҕам саастаах үбүлээрбит Митин Игнатьевич Егоров анал бириистэрин саамай эдэр бильярдист Дьулус Контогоровка, аҕам саастаах бильярдист Радомир Петровка анаата. Бильярд турнира бэйэтэ бырааһынньык курдук ырыалаах-тойуктаах бэрт сэргэхтик ааста.
Икки күннээх түүн кэлбит спортсменнарбытын тотоойутук аһатан-сиэтэн үлэлээбит «Айыллаан» култуура киинин кыргыттарыгар, сүүрэн-көтөн көмөлөспүт уолаттарыгар, үс улуус бильярдистарыгар Василий Спиридонов махталын тириэртэ. Өссө да маннык үрдүк таһымнаах күрэхтэр буола, кыайыылар кэлэ турдуннар. Эһиил Баһылай үбүлүөйдээх сааһыгар 15-с турнирын дьоллоох Дьокуускай куоракка тэрийэр баҕа санаатын эттэ.
Мария СПИРИДОНОВА