Кэнники кэмҥэ өбүгэ оонньуутун оскуола үөрэнээччилэригэр, уһуйаан иитиллээччилэригэр араас ньыманан дьарыктыыллар. Сунтаар нэһилиэгин «Кыталык» уһуйаан эти-сиини эрчийэр инструктора Павел Павлов «Боотурдар оонньуулара» диэн күрэс былдьаһыытын остуол оонньуута оҥорбут.
Павел Павлов Тааттаттан тɵрүттээх, Сунтаар ааттаах мадьыныта, 2016 сыллаахха Дьокуускайдааҕы педколледжын бүтэрэн, Сунтаарга үлэҕэ ананан кэлэр. Кэргэнэ Надеждалыын «Кыталык» уһуйааҥҥа үлэлииллэр. Эти-сиини эрчийэр инструктор дьарыгар сүүстэн тахса оҕо сылдьарыттан хас биирдии иитээччитин ааттарын чуо билэрэ сөхтөрөр.
Байбал хас биирдии дьарыга сахалыы тыыннаах, өбүгэ оонньуутун өрө тутар: ыстаҥалатар, маамыкта бырахтарар, наарта ойдорор. Ону кытта тɵрдүс сылын улууска «Боотурдар оонньуулара» диэн кырачааннарга күөн күрэһи тэрийэн ыытар.
Соторутааҕыта «Боотурдар оонньуулара» барылынан аны остуол оонньуутун оҥорон, тобулан киэҥ биһирэбили ылан эрэр. Холобур, ааспыт сыл түмүгэр өрөспүүбүлүкэтээҕи «Эр киһи иитээччи» форумугар бу айымньылаах үлэтин олус сэргээбиттэрэ, бастыҥ үлэлээх ааттаммыта.
Уһуйаан Павел бу үлэтин патеннатан тарҕатар баҕалаах. Кырачааннар да, улахан да дьон бу оонньууну олус сэргээтилэр. Оонньууну 26 сɵк. кытта түмүктээбит муҥутуур кɵрдɵрүүлээхтэр бааллар.
Мин бу остуол оонньуутун астынным, холонон оонньоон көрдүм. Бу өбүгэ оонньуутун оҕо барыта астына оонньоотун диэн ырабын эттим.
Тускулаана ГОРОХОВА-КОБЕЛЬЯНОВА