«Кыһын Саха сириттэн саҕаланар» бэстибээл чэрчитинэн, ахсынньы 1 күнүгэр киэһэ 5 чаастан Сунтаар нэһилиэгэр Ленин Болуоссатыгар улуус кылаабынай харыйатын уота умайыаҕа.
Бу күн эһигини Тымныы Оҕонньор сиэнинээн, улуус баһылыгын бастакы солбуйааччы Павел Григорьев, Сунтаар нэһилиэгин баһылыгын солбуйааччы Семен Николаев Саха сиригэр кыһын кэлбитинэн, кэлэн иһэр саҥа сылынан истиҥ эҕэрдэлэрин этиэхтэрэ.
«Партизан» НАТК үлэһиттэрэ сүрдээх интэриэһинэй бырааһынньыктааҕы көр-нар тэрийиэхтэрэ. Бу күн араас көрдөөх күрэстэр Сунтаар олохтоохторун, ыалдьыттарын оҕотуттан эмэнигэр тиийэ күүтэллэр. Бастыҥ маскарааттаах тэрилтэлэргэ олохтоох дьаһалта туруорбут үчүгэй да үчүгэй бириистэрэ туттарыллыахтара.
Ону сэргэ Саҥа дьылы саамай күүтэр дьоммут – оҕолорбут Тымныы оҕонньор минньигэс кэһиитин тутуохтара.
Онон, өрөбүл күҥҥэ бэйэҕитигэр аптаах киэһэни бэлэхтээҥ, дуоһуйа сынньаныҥ.
Яина ВЛАСЬЕВА