Дойду араас муннуктарыгар анал байыаннай дьайыыга сырдык тыыннара быстыбыт буойун уолаттарга аналлаах өйдөбүнньүк бэлиэлэри туруоралларын көрөбүт. Үксүн СВО Дьоруойдарыгар баннер оҥорон ыйыыллар. Бу күннэргэ Сунтаар нэһилиэгэр анал байыаннай дьайыы толоонугар олоҕун толук уурбут, геройдуу охтубут, “Эр санааланыы” уордьанынан наҕараадаламмыт Богдан Яковлевка, “Спартак” диэн позывнойдаах эдэркээн уолга, кини чугас дьоно, доҕотторо кыттыһан көстүүлээх сиргэ, үйэлээх тутуулаах баннер туруордулар.
Богдан элбэх оҕолоох Яковлевтар дьиэ кэргэттэригэр иккис уолунан күн сирин көрбүтэ. Оҕо сааһа Кэмбинээт түөлбэтигэр ааспыта, 3№-дээх оскуолаҕа үөрэммитэ. “Сомоҕо” түөлбэ көхтөөх кыттааччыта. Түөлбэтин аатын элбэхтик араас күрэхтэһиилэргэ чиэстээхтик көмүскээбитэ. Оҕо сааһыттан успуорка дьоҕурдаах буолан боксанан утумнаахтык дьарыктаммыта. Боксаҕа 2015с. “Азия оҕолорун” оонньууларын, өрөспүүбүлүкэ турнирдарын кыайыылааҕа. Кэлин ММА көрүҥүнэн дьарыктаммыта. Бу көрүҥҥэ эмиэ өрөспүүбүлүкэ, Уһук Илин эрэгийиэн чемпионаттарын кыайыылааҕынан буолбута.
Оҕотун сүтэрбит ийэ сүрэҕэ өлбөт тыыннаах, хаһан да сойбот тапталлаах. “Богдан оҕо сааһыттан мэник-тэник, чугас дьонугар истиҥ сыһыаннаах, кыайыгас-хотугас майгылаах уол этэ. Араас үлэни кыайа тутара. Успуорду кытта олоҕун ситимниэн баҕарара. Сунтаардааҕы технологическай колледжка үөрэммитэ. Анал байыаннай дьайыыга сырдык тыыннарын толук уурбут дьон аатын үйэтитиигэ туһуламмыт тэрээһиннэри биһиги дьиэ кэргэн өйүүбүт, өйүөхпүт даҕаны. Хорсун уолаттар ааттара умнуллуо суохтаах. Баннер туруортарыыга Богдан доҕотторо, аймахтара, уолбут быстах кэмҥэ үлэлээбит, аҕабыт билигин үлэлиир тэрилтэтэ “Сунтарцеолит” ХЭТ көмөлөстө”, — диэн ийэтэ Клара Яковлева кэпсээтэ. Богдан төһө да кылгас олоҕу олордор, чугас дьонугар мэлдьи эдэр, хорсун санаалаах уолунан хаалыаҕа…
Мира АФАНАСЬЕВА