Кулун тутар 9 күнэ бүтүн Саха сирин успуорду таптааччыларыгар үтүмэн үөрүүнү аҕалла. Ол иһигэр биһиги Сунтаарбытыгар эмиэ.
Бу ый 8-10 күннэригэр Дьокуускай куоракка көҥүл тустууга сахалартан бастакы олимпийскай чөмпүйүөн Р.М. Дмитриев сырдык кэриэһигэр ыытыллар турнирга биир дойдулаахпыт Лев Павлов алтата тустан утарылаһааччыларыгар биир да баалы биэрбэккэ, чахчы кыахтаахтык бастаата. Лев билигин Дьокуускайга Р.М. Дмитриев аатынан олимпийскай эрэллэри бэлэмниир училищеҕа үөрэнэр.
Дьиктитэ, үөрүүлээҕэ өссө маннык. Бэҕэһээ Элгээйигэ улууспутугар Аҕам саастаахтарга ытыктабыл сылынан көҥүл тустууга ССРС успуордун маастара, улуу тириэньэр Д.П. Коркин иитиллээччитэ Иннокентий Иннокентьевич Алексеев бирииһигэр ыытыллыбыт аһаҕас турнирга Арассыыйа, Саха Өрөспүүбүлүкэтин успуордун маастара, Сунтаар улууһун успуордун салайааччыта Семен Павлов төрөппүт уолаттара бииргэ төрөөбүт убайдарын Лев ситиһиитин өссө ытаһалаан биэрдилэр диэххэ сөп. Ол курдук, Элгээйитээҕи 100-тэн тахса эдэр бөҕөс кыттыбыт турнирыгар 19 кг ыйааһыннаах да буоллар, Алмаас Павлов 22 кг тустан үһүс, 35 кг тустубут Семен чөмпүйүөн буоллулар, оттон 52 кг тустубут Филипп үһүс бочуоттаах миэстэ буолан, бэтэрээн тустуук аҕаларын чахчы да үөртүлэр, астыннардылар.
Улаханнык саҥарбаппыт эрээри, бырааттыы тустуук Павловтар тустуу үрдэллэрин өссө да дабайан истиннэр диибит.
Бу уолаттар Аан дойду дьахталларын күнүгэр сөп түбэһэн ситиспит кыайыыларын кырачаан балтыларыгар Златаҕа уонна күн күбэй ийэлэригэр аныыллар.
Иннокентий Алексеев бирииһигэр ыытыллыбыт турнир призердара бырааттыы Павловтар
Роман Дмитриев кэриэһигэр ыытыллыбыт турнир чөмпүйүөнэ Лев Павлов ийэтин кытары. Кини бу кыайыытын ийэтигэр аныыр
Бөҕөстөр кырачаан балтылара Злата
Борис НИКОЛАЕВ