Тохсунньу 10 күнүттэн, Сунтаар улууһун дьаһалтатын 2023 сыллааҕы үлэтин нэһилиэнньэҕэ отчуота саҕаланна. Ол курдук, үһүс бөлөх үлэтин Хадан нэһилиэгиттэн саҕалаата. Сүрүн дакылааты улуус баһылыгын экономическай сайдыыга уонна стратегическай былааннааһыҥҥа солбуйааччыта Борис Васильев оҥордо.
Хадан нэһилиэгин олохтоохторо улуус дьаһалтатын сыллааҕы үлэтин отчуотун истэн баран ыйытыыларын биэрдилэр. Ол курдук, оскуола дириэктэрэ Владимир Гаврильевич оскуола дьиэтэ эргэрбитин, хаарбах туруктааҕын, нэһилиэккэ саҥа оскуоланы тутуу боппуруоһун хайдах түргэтэтиэххэ сөбүн, өрөспүүбүлүкэҕэ уочаракка хаһыс турарын чопчуласта, ону таһынан каадырынан хааччыллыы кыһалҕатын таарыйда. Ыйытыыга үөрэх управлениетын салайааччытын солбуйааччы Владимир Уаров хоруйдаата.
Маны таһынан тыа хаһаайыстыбатыгар, соҕотох төрөппүттээх оҕоҕо көрүллэр көмө, Сунтаар-Өлүөхүмэ суолун тутуу, о.д.а. ыйытыылары биэрдилэр, этиилэрин иһитиннэрдилэр. Отчуот түмүгүнэн Хадан олохтоохторо улуус дьаһалтатын 2023 с.үлэтин биһирииллэрин биллэрдилэр.
Илимниир. Отчуоту истэ Илимниирдээҕи култуура уонна успуорт комплексын киэҥ саалатыгар олохтоох дьон хото муһуннулар.
Отчуот кэннэ ыйытыыларын биэрдилэр, санааларын эттилэр. Үгүс дьон нэһилиэк сүрүн кыһалҕатынан оҕону иитэргэ аныгы кэмҥэ эппиэттиир оскуола суоҕун, кэбиниэттэр тиийбэттэрин, саҥа оскуола тутулларын күүтэллэрин эттилэр. Маны таһынан Бордоҥ балыыһатыгар сыһыарыллыбыт Илимниир нэһилиэнньэтэ, ыарыйдахтарына барар-кэлэр тырааныспары булууга уустуктар баалларын тоһоҕолоон бэлиэтээтилэр, билигин биэлсэр кэлбитэ үчүгэйин эттилэр.
Түмүккэ отчуокка мустубут Илимниир нэһилиэгин олохтоохторо улуус дьаһалтатын ааспыт сыллааҕы үлэтин биһирииллэрин биллэрдилэр.
Туойдаах нэһилиэгин биир сытыы кыһалҕатынан үгүс киһи оскуола дьиэтэ олус эргэрбитин, салгыы оҕону үөрэтэргэ туруга олох мөлтөҕүн эттилэр. Ону тэҥэ сайыҥҥы кэмҥэ өрүһү туорааһын, оттуур сири оҥоруу, нэһилиэк олоҕо: сибээһэ, ититиитэ, оскуола-саад үлэтэ — барыта, уот барда даҕаны, тохтуурун, о.д а. сытыы кыһалҕалары быһаарарга тобулар суоллары булуу боппуруостара көтөҕүлүннүлэр.
Түмүккэ, Туойдаах нэһилиэнньэтэ улуус дьаһалтатын 2023 с. ыыппыт үлэтин биһириирин биллэрдэ.