Кулун тутар 29 күнүгэр Саха сирин Ил Дархана Айсен Николаев улуустар бэтэринээринэй управлениеларын салайааччыларыгар УАЗ массыына күлүүстэрин үөрүүлээх быһыыга-майгыга туттартаата.
Ол курдук, бу күн уопсайа ВДУ-А2 дезинфекциялыыр установкалаах 22 УАЗ массыына күлүүһүн туттардылар. Саҥа тиэхиньикэ күлүүһүн туппут Сунтаардааҕы бэтэринэриийэ управлениетын салайааччыта Степан Михайлов санаатын бу курдук үллэһиннэ:
— Кистэл буолбатах, биһиги үлэбитигэр саҥа тиэхиньикэ өр кэлбэккэ турбута. Суоппардарбыт идэлэригэр бэриниилээх буолан, урукку сыллардааҕы тиэхиньикэни үчүгэйдик көрөн-истэн сүүрдэ сылдьыбыттара. Билигин сыстыганнаах ыарыылар тарҕанар кутталлара элбэх. Онон ыарыы турбатын курдук бохсор үлэ кэмигэр оҥоһуллара ирдэнэр. Улууспут эпизоотическай өттүнэн туруктаах (сыстыганнаах ыарыыта суох) буоларыгар олус туһалаах тиэхиньикэ кэллэ. Ил Дархаммытыгар Айсен Сергеевичкэ, Сахабыт сирин бырабыыталыстыбатыгар, СӨ бэтэринээринэй сулууспа управлениетыгар биһиги улахан махталбытын тириэрдэбит.
Маннык дезинфекциялыыр установкалаах массыыналар сүөһүнү көрөр-харайар сирдэргэ санитарнай обработканы оҥорор аналлаахтар. Инньэ гынан, бэтэринээринэй сулууспа эйгэтигэр эпизоотическай, бэтирнээринэй-санитарнай туругу хонтуруолга тутарга уонна нэһилиэнньэ сыстыганнаах ыарыыттан көмүскэллээх буолуутун үрдэтэргэ улахан көмөлөөхтөр.
Юлия АЛЕКСЕЕВА