Бүгүн, бэс ыйын 7 күнүгэр, Ленин болуоссатыгар, Бүлүү улуустарын ыккардыларыгар ыытыллар тыыл уонна үлэ бэтэрээннэрин VIII спартакиадатыгар кытта барар Сунтаар улууһун бэтэрээннэрин алгыстаан атаардылар.
Атаарар тэрээһиҥҥэ СӨ култууратын бочуоттаах үлэһитэ Мария Тараярова этэҥҥэ ситииһиилээх айаны баҕаран алҕаата, уонна улууспут култууратын үлэһитэ Туйаара Алексеева алгыс тойугун иһитиннэрдэ.
Ону сэргэ улуус баһылыгын социальнай боппуруостарга уонна имиджевай бэлиитикэҕэ солбуйааччы Гаврил Еремеев, физическэй култуура уонна успуорт отделын салайааччыта Дьулустаан Егоров уонна улуус бэтэрээннэрин Сэбиэтин бэрэссэдээтэлэ Афанасий Васильев кыттааччылар бары этэҥҥэ ситииһиилээхтик кыттан кэлэллэригэр алгыс тылларын эттилэр.
Бүлүү улуустарын ыккардыларыгар ыытыллар тыыл уонна үлэ бэтэрээннэрин VIII спартакиадата быйыл Үөһээ Бүлүүгэ бэс ыйын 8-9 күннэригэр, Арассыыйаҕа Дьиэ кэргэн, өрөспүүбүлүкэбитигэр Оҕо саас сылыгар ананан ыытыллар. Үөһээ Бүлүүгэ «Үс Хоһуун» стадиоҥҥа мустан дуобат, саахымат, хабылык, хаамыска, волейболга, остуол тенниһигэр, бильярка, дартска, кыраккыыга, пневматическай винтовканан ытыыга, эстафетаҕа, бальнай үҥкүүгэ күрэстэһиэхтэрэ.
Дмитрий ЫМЫЧАНОВ