Бүлүү бөлөх улуустарын бэтэрээннэрин VIII зональнай спартакиадалара Үөһээ Бүлүүгэ үрдүк таһымҥа тэриллэн, олус көхтөөхтүк уонна көрүҥҥэринэн сытыы киирсиилээх ааста.
Бары улуустар хамаандалара ох курдук оҥостон, хоторго- кыайарга сорунан кэлбиттэр. Хаһаайыттар чахчы бастыыр курдук оҥостубуттара, күүстээх хамаанданы туруорбуттара эрдэттэн биллибитэ. Үөһээ Бүлүү улууһун салалтата бэтэрээннэр спартакиадаларын үрдүк таһымҥа тэрийэн ыыппыттара киһини үөрдэр. Сунтаар хамаандатын Түүкээн үрэҕэр Оҥхой нэһилиэгин дьоно-сэргэтэ минньигэс алаадьылаах, кыынньа сылдьар кымыстаах, ырыалаах-тойуктаах көрүстүлэр уонна салгыы айаммытын алҕаан атаардылар. Онтон Үөһээ Бүлүүгэ биһиги хамаандабытыгар сыһыарыллыбыт улуус дьаһалтатын исписэлииһэ Июлия Васильевна паромҥа көрсөн хонуктуур сирбитигэр “Теремок” детсадка сирдээн илдьитэлээтэ. Детсад үлэһиттэрэ эйэҕэстик көрсөн, толору астаах остуолу тарда охсон, тото-хана аһаттылар. Олус истиҥ көрсүһүү буолла, сылаас уулаах душ бэлэмнээбиттэрин көрдөрдүлэр. Үс улуус бэтэрээннэрэ бары биир сиргэ түстүбүт. Аҕам саастаах дьон доҕотторун, билэр дьоннорун көрсөн үөрүү-көтүү буолла, саастаах дьон эдэр, эрчимнээх саастарын санаан олох өрө тэйэ, оту-маһы тардыалаан көрө сылдьар дьон буоллулар.
Спартакиада олус тэрээһиннээхтик, судьуйалар чуолкай сыанабылларынан чиэһинэйдик барда. Түмүгэр Үөһээ Бүлүү бэтэрээннэрин хамаандата эрэллээхтик бастаата, иккис – Бүлүү, үһүс – Ньурба хамаандалара буоллулар. Сунтаар бхамаандата быйыл инники миэстэҕэ тиксибэтэ. Ол эрээри кыраккыыга, спортиҥҥа биһиги уолаттарбыт иннилэрин биэрбэтилэр, остуол тенниһигэр, сыалы ытыыга уонна бальнай үҥкүүгэ биһиги дьоммут бириистээх миэстэҕэ тигистилэр. Култуурунай тэрээһиҥҥэ Баҕатаан Саргын Арыылаах уола бэйэтин ырыатынан мустубут дьон сүрэҕин тутта, биһирэбиллэрин ылыаҕын ылла.
Улууспут дьаһалтата олус диэн кыһаллан хамаанда айанын тэрийэн, ороскуотун уйунан ыыппытыгар, спонсордарбыт бырааттыы Алексей уонна Игнат Яковлевтар, Александр Петров көмөлөрүн иһин бэтэрээннэр улахан махталбытын тириэрдэбит. Быйылгы алҕастары туоратан, эһиил үбүлүөйдээх сылга ситиһиилээхтик спартакиадаҕа кыттарга бары күүһү түмэрбит наада.
Санаабытын түһэрбэппит. Норуокка мээнэҕэ эппэттэр: “Уол оҕо биир күн – ат өрөҕөтүгэр, биир күн – ат уорҕатыгар” диэн.
Афанасий ВАСИЛЬЕВ, Сунтаар улууһун бэтэрээннэрин Сэбиэтин бэрэссэдээтэлэ