Бүгүн Сунтаарга «Бриллиантовай ноткалар» бэстибээл «Олоҥхо дойдутун талааннара» диэн дьоҕуру көрөр куоҥкурус ыытылынна.
Сунтаар 1-кы №-дээх оскуолатын 8-с «в» кылааһын үөрэнээччилэрэ «Удьуор» фольклорнай ансаамбыла бэстибээли арыйар чиэскэ тигистибит. Биһиги бу бэстибээлгэ кыттан үөрүүбүт үгүс. Ол курдук, күрэс түмүгүнэн 1-кы истиэпэннээх Дипломан буоллубут.
Мин санаабар, бу олус үчүгэй бэстибээл. Тоҕо диэтэххэ, кэнчээри ыччаты үрдүк таһымҥа таһаарар. Дьүүллүүр сүбэ Александр Титигиров, бэйэтинэн кэлэн маннык курэхтэри тэрийэн ыыталлара Саха сирин талааннаах оҕолоро сайдалларыгар улахан көмө буолар. Бэстибээлгэ Сунтаар улууһун элбэх нэһилиэгиттэн кытта киирбиттэр: Элгээйи, Тойбохой, Бордоҥ, Кутана о.д.а.
Манна кыттар оҕолор бэйэлэрин талааннарын, дьоҕурдарын сайыннаран, саҥа билиини ылаллар. Элбэх дьону кытта алтыһан, саҥа доҕоттордонон, бэйэлэригэр эрэллээх буолан, олоҕу көрүүлэрэ уларыйыан сөп. Ону тэҥэ үүнүүгэ-сайдыыга тардыһаллара улаатар, бэйэлэрин бырайыактарын олоххо киллэрэргэ көмө буолар.
Алина АНДРЕЕВА,
Сунтаар 1-кы №-дээх оскуолатын 8 «в» кылааһын үөрэнээччитэ