Сунтаар улууһун үөрэҕирии салалтата (начаалынньык Борис Васильев) Арассыыйаҕа Аҕа дойду, Саха Өрөспүүбүлүкэтигэр Ийэ дойду көмүскээччилэрин сылларынан, Сунтаар улууһугар С.А.Зверев-Кыыл Уола 125 сылыгар, Улуу Кыайыы 80 сыллаах үбүлүөйүгэр аналлаах үөрэх тэрилтэлэрин ыккардыларыгар «Олоҥхо дойдутун оҕолорун оһуордаах түһүлгэтэ» улуустааҕы бэстибээли тэрийэн ыытар.
Муус устар 9 күнүгэр «Олоҥхо дойдутун оҕолорун оһуордаах түһүлгэтэ» улуустааҕы бэстибээл С.А.Зверев-Кыыл Уола аатын сүгэр Түбэй-Дьаархан орто оскуолатыттан саҕаламмыта дириҥ суолталаах. Ону таһынан, бу күн Бүтүн Арассыыйатааҕы «Оҕо саас сирдьиттэрэ» иитиигэ тирэх киин былаанынан С.А. Зверев-Кыыл Уолугар анаммыта.
Улуустааҕы бэстибээл сыалынан үүнэр көлүөнэҕэ Улуу Кыайыы 80 сыла Арассыыйа историятыгар улахан суолтатын өйдөтүү, төрөөбүт дойдунан киэн туттууну, ытыктабылы үөскэтии, С.А.Зверев-Кыыл Уолун айар үлэтин үйэтитии, үүнэр көлүөнэҕэ киэҥник тарҕатыы, норуот тылынан уус-уран айымньытын толорууну өйөөһүн уонна сайыннарыы, саҥа талааннары арыйыы, толоруу маастарыстыбатын үрдэтии буолаллар.
Бэстибээл бырагарааматынан дьүүллүүр сүбэ туһааннаах нүөмэрдэри сыаналыыр. Ол курдук, хор толоруутугар икки ырыа («День Победы» нууччалыы ырыа, Ийэ дойдуга аналлаах сахалыы ырыа), норуот уус-уран тылынан айымньыта(чабырҕах, үгэ), тойук, сахалыы үҥкүү, оһуохай уо.д.а.
Билиҥҥи үөрэх ирдэбилинэн оскуола түмэлэ патриотическай иитиигэ биир сүрүн миэстэни ылар. Бэстибээл чэрчитинэн хас биирдии оскуола Улуу Кыайыыга аналлаах, сэриигэ кыттыбыт биир дойдулаахтарын, буойун учууталларын, сэрии сылларын оҕолорун, тыыл бэтэрээннэрин тустарынан экспозицияларын дьүүллүүр сүбэ сыаналаата.
Дьүүллүүр сүбэ састаабыгар иитии уонна эбии үөрэхтээһин отделын сэбиэдиссэйэ Александра Павлова, иитии уонна эбии үөрэхтээһин отделын сүрүннүүр исписэлииһэ Сахаайа Тихонова, Сунтаардааҕы гимназия музыкаҕа, саха тылыгар учуутала Алена Сергеева, Л.А.Попов аатынан Сунтаар улууһун бибилэтиэкэтин кыраайы үөрэтэр отдел сэбиэдиссэйэ Мария Иванова үлэлээтилэр. Түбэй Дьаархан, Сиэйэ, Түбэй, Кутана, Күүкэй, Элгээйи, Толоон, Хоро, Кэмпэндээйи, Уустуйа оскуолаларын үөрэнээччилэрэ «Олоҥхо дойдутун оҕолорун оһуордаах түһүлгэтэ» улуустааҕы бэстибээлгэ дьоҕурдарын, талааннарын көрдөрдүлэр.
Бэстибээл улуус оскуолаларынан салҕанан барар. Маннык киэҥ ис хоһоонноох патриотическай тэрээһиннэр үүнэр көлүөнэни иитиигэ төрүт үгэһиттэн саҕалаан үтүө түмүктээх, кэскиллээх буолаллар.
Антонина ПРОКОПЬЕВА