Владимир Путин Саха сиригэр сырыытыгар Уһук Илин эрэгийиэҥҥэ үлэлиир араас эйгэ исписэлиистэрин кытта көрүстэ, ыйытыыларга хоруйдаата. Манна Уһук Илин эрэгийиэҥҥэ тыа сиригэр баран үлэлиир исписэлиистэргэ судаарыстыбаттан көрүллэр анал бырагыраамаларга сыһыаннаах боппуруостары көтөхтүлэр. Хаһыс да сылын үлэлиир «Земскэй доктор» тосхол көрөр үбүн улаатыннарар туһунан этиини дойду бэрэсидьиэнэ болҕойон иһиттэ.
«Земскэй доктор» тосхол чэрчитинэн улуус киин балыыһатын кылаабынай бырааһын тэрийэр-мэтэдиичэскэй үлэҕэ солбуйааччы Нюргустана Тимофеева санаатын маннык этэр:
— Урукку кээмэйтэн икки төгүл үрдээбит көрүллэр үп 50 тыһ. киһиттэн аҕыйах нэһилиэнньэлээх пууннарга көрүллүбэтин, урукку оннунан хаалбытын, ону тэҥниири туох дии саныырын ыйыппыттарыгар «бу сөптөөх этии, көрсүһүү кэннэ бырабыыталыстыбаҕа сорудах быһыытынан туруоруом» диэтэ. Бу сөптөөх быһаарыы диибин. Биһиэхэ тыа сиригэр олорор дьон ахсаана аҕыйаҕын билэбит. Тыа сиригэр медицинэ үлэһитэ өрүү тиийбэт.
«Земскэй доктор», » Земскэй фельдшер» тосхоллорунан биһиги улууспутугар медиктэр үлэлии кэлэллэр. Күн бүгүҥҥү туругунан 22 үлэһит бу тосхолунан дуогабардаах үлэлии сылдьаллар. Бу сылга бэс ыйыгар фтизиатр-быраастанныбыт, тосхолго киирсэр былааннаах, ону таһынан анестезиолог-реаниматолог бырааһы кытта дуогабар түһэристибит. Судаарыстыбаттан өйөбүл өссө улаатар түгэнигэр медиктэри тыа сиригэр кэлэллэрин күүскэ көҕүлүүргэ улахан өйөбүл буолуо этэ.